Қарағанди вилоятида 8000 дан ортиқ ўқувчи коллежларга грант асосида ўқишга кириши мумкин
«Охирги уч йил ичида бизда коллежда ўқиш истагида бўлган ўқувчилар сони кўпайди. 2025 йилга бориб техник ва касб-ҳунар таълимини бепул 100 фоизга етказишни режалаштирганмиз. Шунингдек, жорий ўқув йилидан бошлаб вилоятда Қарағанди касб-ҳунар-техника коллежи ва Темиртау техника коллежи негизида 10-11 синф ўқувчиларининг «сартарошлик» ва «пайвандчи» мутахассисликлари бўйича амалий машғулотлари йўлга қўйилди. 10-11 синф ўқувчилари эрталаб мактабда, тушдан кейин (3-4 соат) ушбу коллежлар базасида таҳсил олади. Улар мактабни тугатгач, ўрта маълумот тўғрисидаги аттестат ва малака дипломига эга бўлади», - деди Индира Исқақова ҳудудий коммуникациялар хизмати платформасида ўтказилган брифингда.
Вилоятда техника ва касб-ҳунар таълими тизимида 55 та коллеж мавжуд. Мутахассислар 97 мутахассислик ва 114 малака бўйича тайёрланади. Коллежларда 31 912 нафар талаба таҳсил олади, шундан 21 516 нафари давлат буюртмаси асосида. Кадрларни сифатли тайёрлаш учун 42 та коллежда 6 минг 425 нафар кишини қамраб олган дуал таълим жорий этилди.
«Ёш мутахассис» лойиҳаси доирасида 14 та таълим муассасаси АҚШ, Италия, Германия, Швеция, Франция, Австрия каби давлатларда ишлаб чиқарилган жаҳон брендларидаги замонавий жиҳозлар билан таъминланган.
Бу йил коллежларнинг давлат буюртмаси бўйича кундузги таълим бўлимига ҳужжатлар асосий ўрта таълим базасида 25 июндан 18 августга қадар, тўлов асосида – 25 июндан 25 августгача, шундан кечки ва сиртқи таълимга – 25 июндан 20 сентябргача, ижодий тайёргарликни талаб қиладиган касблар учун эса - 25 июндан 20 июлгача, ҳамда педагогика ва тиббиёт мутахассисликлари учун - 25 июндан 15 августгача қабул қилинади.
Муаллиф: Агата Мухамеджанова
