Қадимий Хива ислом оламининг сайёҳлик пойтахтига айланди
TASHKENT. Kazinform - Ислом ҳамкорлик ташкилоти (ИҲТ) Ўзбекистоннинг қадимий Хива шаҳрига “Ислом оламининг 2024 йилги сайёҳлик пойтахти” сертификатини топширди, деб хабар беради Kazinform мухбири.
Хива шаҳрига туристик пойтахт мақомини бериш тўғрисидаги қарор 2022 йил июнь ойида Озарбайжон пойтахти Боку шаҳрида бўлиб ўтган ИҲТга аъзо давлатлар туризм вазирларининг XI сессиясида қабул қилинган эди.
Тантанали тадбирда Ислом ҳамкорлик ташкилоти котибияти, аъзо давлатларнинг туризм вазирлари, халқаро экспертлар, оммавий ахборот воситалари вакиллари иштирок этди.
– Ислом ҳамкорлик ташкилоти томонидан Хива шаҳрига Ислом оламининг сайёҳлик шаҳри мақоми берилгани Хива шаҳрининг халқаро туризм бозорида янада машҳур сайёҳлик масканига айланиши имконини беради. ЮНЕСКО мутахассислари Хивани қадимий Афина, Рим ва Қоҳирага тенг шаҳар сифатида баҳоладилар. Хива шаҳри ТУРКСОЙ халқаро ташкилоти томонидан туркий дунёнинг маданий пойтахти сифатида эътироф этилди, – деди Ўзбекистон Туризм қўмитаси раисининг биринчи ўринбосари Жамшид Абдусаломов.
ИҲТ Бош котиби ўринбосари Аҳмад Кавеса Сенгендо Хива ҳокимига шаҳарга “Ислом оламининг 2024 йилги сайёҳлик пойтахти” мақоми берилгани муносабати билан сертификат топширди.
– Маълумки, Хива ўтмишда маданият ва илм-фан маркази сифатида эътироф этилган. Астрономия, математика, кимё бўйича кўплаб таълим муассасалари ва йирик илмий марказлар мавжуд эди. Хива ўзининг бой тарихи, меъморчилиги ва маданияти билан умумий меросимиз мазмун-моҳиятини ифодалайди, – деди Аҳмад Кавеса Сенгендо.
Ушбу мақомнинг берилиши муносабати билан жорий йилнинг май ойида Хивада ИҲТга аъзо давлатлар туризм вазирларининг XII сессияси бўлиб ўтади, унда “Хоразм хонларининг таомлари” гастрономик фестивали ўтказилади, илмий-амалий конференция, фото ва бадиий кўргазмалар ташкил этилади.
Ноябрь ойида Халқаро зиёрат туризми ҳафталиги доирасида “Хива – ислом цивилизациясининг сайёҳлик маркази” мавзусида илмий-амалий конференция ташкил этиш режалаштирилган. Бу зиёрат туризми учун мавжуд салоҳиятни очиши кутилмоқда.
Муаллиф: Мадибек Жанибеков
