Июнь ойида энг кўп олтинни Ўзбекистон ва Ҳиндистон сотиб олган

ASTANA. Kazinform – Июнь ойи якунига кўра Ўзбекистон ва Ҳиндистон дунёда энг кўп олтин сотиб олган давлатлар орасида етакчилик қилди. Бу ҳақда Жаҳон олтин кенгаши (World Gold Council) хабар берди.

Жаҳон марказий банкларининг захиралари бир ой ичида 12 тоннага ошди. Олтин сотиб олиш ҳажми 31 тоннани, сотиш эса 18 тоннани ташкил этди.

Қимматбаҳо металнинг асосий харидорлари Ўзбекистон Марказий банки ва Ҳиндистон захира банки бўлди – ҳар бири 9 тоннадан. Польша 4 тонна, Қатар 3 тонна, Иордания ва Чехия ҳар бири 2 тоннадан, Туркия 1 тонна сотиб олди.

Июнь ойида олтин сотиш бўйича етакчи Сингапур Марказий банки бўлди — 12 тонна. Қозоғистон Миллий банки 6 тонна олтин сотди.

Йил бошидан буён Ўзбекистон томонидан сотилган олтиннинг соф миқдори 7 тоннага етди. Бу кўрсаткич бўйича Ўзбекистон Таиланд (10 тонна) ва Филиппиндан (25 тонна) кейин учинчи ўринда туради. Қимматбаҳо металнинг асосий харидорлари Туркия, Ҳиндистон ва Хитой бўлди.

Июнь ойида олтин нархи бир унция учун 2350 доллардан 2325 долларгача (-1%) пасайди. Аммо 1 август куни олтин нархи рекорд даражага кўтарилиб, унция учун 2501 доллардан ошди.

Эслатиб ўтамиз, ўтган йили Қозоғистон олтин қазиб олиш бўйича етакчи давлатлар қаторидан жой олган эди.