Исроил-Ливан чегараси яқинида тўрт нафар Таиланд фуқароси ҳалок бўлди
ASTANА. Кazinform - Исроил-Ливан чегараси яқинидаги Исроилнинг Метула шаҳри атрофида ракета ҳужуми оқибатида тўрт нафар Таиланд фуқароси ҳалок бўлди, бир нафари яраланди. Бу ҳақда жума куни Таиланд Ташқи ишлар вазири Марис Сангиампхонг маълум қилди, дея хабар беради Kazinform мухбири.
“Исроил-Ливан чегараси яқинидаги Метула шаҳри атрофида ракета ҳужуми оқибатида тўрт нафар таиланд ишчиси ҳалок бўлгани ва бир нафари яралангани ҳақидаги хабар мени чуқур қайғуга солди”, — деб ёзди Сангиампхонг Х ижтимоий тармоғида.
Таиланд ТИВ раҳбари мамлакатнинг Тель-Авивдаги элчихонасига жароҳатланганлар ва ҳалок бўлганларнинг оилаларига ҳар томонлама ёрдам кўрсатишни топширганини қўшимча қилди.
Исроил матбуоти хабарларига кўра, Метула минтақавий кенгаши раҳбари пайшанба куни кечқурун Ливан ракета ҳужуми оқибатида беш киши, жумладан, маҳаллий фермер ва тўрт нафар фермадаги хорижлик ишчи ҳалок бўлганини айтди.
Таиланд Ташқи ишлар вазирлиги маълумотларига кўра, ўтган йили ХАМАСнинг Исроилга қилган ҳужумларида ҳалок бўлган 1200 киши орасида 46 нафар Таиланд фуқароси ҳам бор.
“Таиланд узоқ давом этган ушбу можаро натижасида катта жабр кўрган бегуноҳ тинч аҳоли учун барча томонларни тинчлик йўлига қайтишга чақиришда давом этмоқда”, — деди Таиланд Ташқи ишлар вазири.
Эслатиб ўтамиз, Исроил Ливан шимоли-шарқига зарба бергани ҳақида ёзган эдик.
