Хитой ва Шимолий Корея ўртасида янги кўприк очилди
ASTANA. Kazinform — Хитой ва Корея Халқ Демократик Республикаси (Шимолий Корея) ўртасидаги Ялуцзян дарёсида қурилган янги кўприкда транспорт ҳаракати расман очилди. Икки мамлакат вакиллари трансчегаравий транспорт йўлининг очилиш маросимини биргаликда ўтказди, деб хабар беради Синьхуа ахборот агентлиги.
Янги осма кўприк Хитойнинг шимоли-шарқидаги Ляонин вилоятининг Даньдун шаҳрини Шимолий Кореянинг Пхёнан-Пукто вилоятида жойлашган Синийжу шаҳри билан боғлайди.
Иккита таянч минораси ва икки қатор осма трослар билан мустаҳкамланган кўприкнинг қатнов қисми кенглиги 28,5 метрни ташкил этади. У икки йўналишда тўртта ҳаракатланиш бўлагига мўлжалланган. Кўприкнинг сув сатҳидан баландлиги эса сув сиғими 3 000 тоннагача бўлган кемаларнинг унинг остида бемалол ўтиш имконини беради.
Хитой Ташқи ишлар вазирлигининг расмий вакили Мао Нин чоршанба куни кўприкнинг очилиши икки мамлакат ўртасидаги савдо-иқтисодий ҳамкорликни ва халқлар ўртасидаги алоқаларни янада ривожлантиришга хизмат қилишини маълум қилди.
Унинг таъкидлашича, Хитой ва Шимолий Корея — умумий тоғлар ва дарёлар боғлаб турувчи дўстона қўшнилардир. Ялуцзян дарёси орқали ўтувчи янги кўприк эса икки мамлакат транспорт инфратузилмасини ўзаро боғлайдиган муҳим иншоот ҳисобланади.
Даньдун порти — Хитойнинг Шимолий Корея билан чегарадаги энг йирик савдо порти. Янги автомобиль кўприги қурилишидан олдин Ялуцзян дарёси орқали ўтувчи эски кўприкдан фойдаланиб келинган. У Хитой-КХДР дўстлик кўприги номи билан ҳам машҳур. Эски кўприк автомобиль ва темир йўл қатнови учун мўлжалланган бўлиб, бир йўналишда фақат оғирлиги 20 тоннадан ошмайдиган юк автомобилларининг ҳаракатланишига рухсат берилган.
Мазкур чекловлар туфайли Хитой ва Шимолий Корея 2010 йилда мавжуд кўприкдан қуйи оқимда янги автомобиль кўпригини қуриш тўғрисида келишувга эришган.
