Германия ва Қозоғистон ўртасидаги энергетика соҳасидаги ҳамкорлик яхши ривожланмоқда - Олаф Шольц
ASTANA. Kazinform - Германия ва Қозоғистон ўртасидаги энергетика соҳасидаги ҳамкорлик яхши ривожланмоқда. Бу ҳақда Ақордада Давлат раҳбари Қасим-Жомарт Тоқаев билан кенгайтирилган музокаралар чоғида Германия Федерал канцлери Олаф Шольц маълум қилди.
“Ўтган йили муносабатларимиз яхши ривожланди, кўриб турибмизки, катта иқтисодий алоқалар ҳам бўлади. Мен билан катта делегация, бизнес вакиллари келди. Мақсадимиз - иқтисодий алоқаларимиз учун яхши шароит яратиш, мамлакатларингизга тўғридан-тўғри сармоя киритиш, савдо-сотиқни жонлантиришдир. Энергетика соҳасидаги ҳамкорликда яхши ютуқларга эришмоқдамиз. Нефть келади. Биз бундай ишончли, ҳақиқий, аниқ ва изчил ҳамкорликдан жуда хурсандмиз”, — деди Германия раҳбари.
Шу билан бирга, у кичик гуруҳ музокараларида Қозоғистон Президенти билан халқаро таҳдидлар юзасидан фикр алмашганини таъкидлади. Унинг айтишича, Россия ва Украина ўртасидаги можаро ҳам эътибордан четда қолмаган.
“Дунёда тинч савдо мавжудлиги, протекционистик интилишлар амалга ошмагани биз учун жуда муҳим. Шу муносабат билан бугунги учрашув ва эртага барча Марказий Осиё давлатлари Президентлари билан бўладиган учрашувдан жуда хурсандман. Ушбу учрашувга жуда яхши тайёргарлик кўрганингиздан миннатдорман ва бу албатта муваффақиятга олиб келади”, - деди Олаф Шольц.
Эслатиб ўтамиз, аввалроқ Давлат раҳбари Қасим-Жомарт Тоқаев Астана шаҳрига расмий ташриф билан келган Германия Федерал канцлери Олаф Шольц Ақордада кутиб олгани ҳақида ёзган эдик.
