Ғарбий Қозоғистон вилоятида шахмат бўйича ORAL OPEN халқаро турнири бошланди
Ушбу мусобақада АҚШ, Арманистон, Ҳиндистон, Беларусь, Украина, Россия, Ўзбекистон, Швеция, Туркия, Дания, Черногория ва Қозоғистондан 180 нафарга яқин шахматчи иштирок этмоқда, деб хабар беради Ғарбий Қозоғистон вилояти Жисмоний тарбия ва спорт бошқармаси матбуот хизмати.
Улар орасида 17 нафар халқаро гроссмейстер бор.
Турнирнинг очилиш маросимида Ғарбий Қозоғистон вилояти ҳокимининг биринчи ўринбосари Ержан Балтаев, ҚР шахмат федерацияси вице-президенти Александр Бабенко спортнинг ушбу интеллектуал турини кенг ривожлантиришда бундай мусобақалар муҳим аҳамият касб этишини таъкидлаб, мусобақа иштирокчиларига муваффақиятлар тилади.
Тадбирда таъкидланганидек, Ғарбий Қозоғистон вилоятида ўзига хос шахмат мактаби мавжуд. Вилоятдан халқаро гроссмейстер Муртас Қажиғалиев, шунингдек, Валерий Мин, Алибек Игамбергенов, Роман Козлов, Жанат Сайин, Азамат Ўтеғалиев, Айсезим Мухит, Алихан Ерғалиев, Лаура Абдилдаева каби мамлакатда эътироф этилган шахмат усталари етишиб чиққан.
Халқаро танлов 28 июль куни якунланади.
Муаллиф: Ғайсағали Сейтақ
