Forbes рўйхатидаги олигархлар ва йирик компаниялар Қозоғистоннинг жабрланган ҳудудларига ёрдам бериш учун 100 миллиард тенге ажратди
Forbes рўйхатидаги қозоғистонлик миллиардерлар ҚР Президенти Қасим-Жомарт Тоқаевнинг тошқиндан жабр кўрган ҳудудларга қўшимча маблағ ажратиш ҳақидаги чақириғига жавоб берди, деб хабар беради Каzinform агентлиги.
Булат Утемуратов Ақтўбе вилояти аҳолиси учун 10 миллиард тенге ажратиш орқали уларни қўллаб-қувватлашга қарор қилди. Маблағ уйсиз қолган қозоғистонликлар учун уй-жой қуришга сарфланади.
“Тошқин зонасида жойлашган ҳудудлардаги фавқулодда вазиятни чуқур ҳамдардлик билан кузатаман. Табиий офат кўлами кенгаймоқда, одамлар шошилинч ёрдамга муҳтож ва биз уни бор кучимиз ва мавжуд ресурсларимиз билан таъминлашда давом этамиз. Президент олдинги сафда бўлиб, мушкул аҳволга тушиб қолган минглаб юртдошларимизнинг хавфсизлиги ва эртанги кунга ишончи кафолати бўлмоқда, унинг қарорлари биз томондан ҳамиша қўллаб-қувватланади”, – деди Булат Утемуратов.
Тимур Кулибаев Атирау вилоятига ёрдам бериш учун 30 миллиард тенге ажратади. Маблағлар уй-жой қуриш ва реконструкция қилиш, инфратузилма объектларини тиклаш, шунингдек, сув тошқинларидан жабр кўрган аҳолини қўллаб-қувватлашга йўналтирилади.
“Мен тошқиндан жабрланганларга чуқур ҳамдардман. Биз илк кунларданоқ сув тошқинидан жабр кўрган ҳудудларга ёрдам кўрсатаяпмиз. Ишончим комилки, Президентимиз Қасим-Жомарт Кемелевич Тоқаев раҳнамолигида биз барча қийинчиликларни биргаликда енгамиз”, – деди Тимур Кулибаев.
Kazakhmys компаниялар гуруҳи, KAZ Minerals, Altynalmas, Karazhyra ва RBK Bank тошқинлардан жабр кўрган қозоғистонликларга ёрдам бериш учун қўшимча равишда 40 миллиард тенге ажратади. Матбуот хизмати хабарига кўра, маблағлар инфратузилмани тиклаш ва ижтимоий объектлар: болалар боғчалари, мактаблар, шифохоналар, шунингдек, турар-жой биноларини қуришга йўналтирилади.
Ўз навбатида Kaspi.kz ҳаммуассислари Вячеслав Ким ва Михаил Ломтадзе кеча Шимолий Қозоғистон ва Ақмўла вилоятларига 20 миллиард тенге ўтказиш орқали ёрдам беришларини маълум қилишди. Пул янги уй-жой қуриш учун эмас, балки ҳудудларни тиклаш учун сарфланади.
“Бизнинг севимли мижозларимиз, ҳамкорларимиз ва ходимларимиз жабрланган ҳудудларда яшайди. Тошқиннинг дастлабки кунлариданоқ улар билан доимий алоқада бўлиб, вазиятни яхши биламиз. Биз Kaspi.kz мобиль иловасида зудлик билан хайрия йиғишни ташкил қилдик ва қутқарув ускуналари, ўқ-дорилар, ёқилғи-мойлаш материаллари ва бошқа биринчи тиббий ёрдам кўрсатиш учун Biz Birgemiz Qazaqstan жамғармасига маблағ ажратдик. Афсуски, бир қатор ҳудудларда ҳамон ҳалокатли вазият сақланиб қолмоқда. Биз Президент ташаббусини қўллаб-қувватлаш ва мана шу оғир паллада мамлакатга фойдали бўлишни ўзимизнинг фуқаролик бурчимиз деб биламиз”, – деди Kaspi.kz бошқаруви раиси Михаил Ломтадзе.
Давлат раҳбари аввалроқ Қостанай вилояти тадбиркорлари ва кўнгиллилари билан учрашувда жабрланганларга ёрдам кўрсатишда ишбилармонларнинг ўрни муҳимлигига эътибор қаратган эди. Унинг сўзларига кўра, улар Forbes рўйхатидаги миллиардерлар билан суҳбат ўтказадилар ва уларнинг ҳар бирига сув тошқинлари оқибатларини бартараф этишда ёрдам беришлари керак бўлган ҳудудларни белгилайдилар.
Шу муносабат билан Каzinform таҳририяти Қозоғистон бизнесининг қайси вакиллари мамлакатнинг тошқиндан зарар кўрган ҳудудларини тиклашда фаол иштирок этиши мумкин бўлганлар рўйхатини таҳлил қилишга қарор қилди.
