Эрон Қозоғистонга далаларни суғориш учун замонавий технологияларни таклиф қилишга тайёр

ASTANA. Кazinform – Эрон Қозоғистонга автоматик томчилатиб суғориш тизимини таклиф қилишга тайёр. Бу ҳақда Сув ресурслари ва ирригация вазири Нуржан Нуржигитовнинг Эроннинг Қозоғистондаги Фавқулодда ва Мухтор элчиси Али Акбар Жоукар билан учрашувида маълум қилинди.

ҚР Сув ресурслари ва ирригация вазирлиги матбуот хизмати хабарига кўра, учрашув чоғида далаларни суғориш ва суғориш сувини етказишда сув сарфини камайтириш бўйича тажриба ва технологияларни алмашиш масаласи муҳокама қилинди, хусусан, Эрон компаниялари Қозоғистонга ер ости сувларидан фойдаланадиган замонавий суғориш тизимлари, шунингдек, ўсимликлар учун сувни тўғридан-тўғри илдизларга етказиб берадиган автоматик томчилатиб суғориш тизимини таклиф қилишга тайёр. Ушбу технологиялар натижасида Эрон шоли етиштириш учун сув сарфини сезиларли даражада камайтирди ва ҳосилдорликни оширди.

“Бугун биз сув омборлари ва бошқа сув хўжалиги объектларини қуриш ва реконструкция қилиш бўйича кенг кўламли ишларни бошладик. Эрон компаниялари бу борада катта тажрибага эга ва самарали технологияларни ишлаб чиқмоқда. Улардан баъзилари мамлакатда ишламоқда. Хусусан, Жамбил ва Туркистон вилоятларида ирригация тармоқларини янгилаш ишлари жадал олиб борилмоқда. Шу боис эронлик тадбиркорларни сув инфратузилмасини қуриш ва таъмирлаш бўйича тендерларда иштирок этиш учун мамлакатимизга таклиф этмоқчиман”, — деди Сув ресурслари ва ирригация вазири Нуржан Нуржигитов.