Давлат раҳбари Франция Президенти билан кенгайтирилган таркибда музокаралар ўтказди
PARIS. Кazinform – Қасим-Жомарт Тоқаев Франция томони Қозоғистон делегациясини самимий кутиб олганини таъкидлади ва Эммануэль Макронга миннатдорлик билдирди. Бу ҳақда Ақорда матбуот хизмати хабар берди.
“Бу ташрифга алоҳида эътибор қаратаман. Бу Қозоғистон ва Франция ўртасидаги стратегик шерикликнинг янги босқичи бўлади. Бугунги музокаралар ва қабул қилинган Қўшма декларация ҳамкорлигимизни юқори стратегик даражага кўтаришга хизмат қилади. Фурсатдан фойдаланиб, Сизни Парижда ўтказилган 33-Олимпия ва Паралимпия ўйинларидаги муваффақият билан табриклайман. Бу жаҳон спортида кенг кўламли ва аҳамиятли воқеа эканлиги аниқ. Жаҳон жамоатчилиги юқори савияда ўтган мусобақага гувоҳ бўлди. Мамлакатингиз 2030 йилда Франция Альп тоғларида ўтказиладиган йигирма олтинчи қишки Олимпия ўйинларини юксак савияда ташкил этишига ишонаман”, – деди Давлат раҳбари.
Қасим-Жомарт Тоқаев Франция Президентининг ўтган йили Астана шаҳрига ташрифи чоғида эришилган келишув ва битимлар Қозоғистон-Франция муносабатларини ҳар томонлама чуқурлаштиришга катта туртки бўлганини таъкидлади.
“Айни пайтда давлатларимиз ўртасида фаол ва ишончли сиёсий мулоқот олиб борилмоқда. Қозоғистон ва Франция халқаро майдонда яқин муносабатлар ўрнатиб, кўп томонлама тузилмалар доирасида тинчлик ва барқарор ривожланиш тамойилларини илгари суряпти. Франция - бизнинг энг йирик савдо ҳамкорларимиздан биридир. Мамлакатингиз Қозоғистон иқтисодиётига катта сармоя киритаётган етакчи давлатлардан бири. Бугунги кунда Қозоғистонда Франция сармояси иштирокида 200 дан ортиқ компания ва қўшма корхоналар фаолият кўрсатмоқда. Қозоғистонда фаол ишлаш истагида бўлган француз бизнес вакилларига самимий миннатдорлик билдираман”, – деди Қасим-Жомарт Тоқаев.
Қозоғистон Президенти маданий-гуманитар алоқалар, жумладан, таълим, фан, тиббиёт ва тарих соҳаларида ҳамкорлик жадал ривожланиб бораётганига эътибор қаратди. Шунингдек, жаҳонга машҳур Гиме музейида Қозоғистон миллий санъатига бағишланган кўргазма очилганини алоҳида миннатдорлик билан қайд этди.
Нутқ сўнгида Қасим-Жомарт Тоқаев бугунги ташриф натижалари икки халқ фаровонлигига ижобий таъсир кўрсатишига ишонч билдирди. Франция Президенти Қозоғистон-Франция ҳамкорлиги ривожига янги суръат бахш этадиган музокаралар муҳимлигини таъкидлади.
“Сизнинг шарофатингиз билан кейинги йилларда икки давлат ўртасидаги шериклик сезиларли даражада мустаҳкамланди”, – деди Эммануэль Макрон.
Музокаралар чоғида давлат раҳбарлари машинасозлик, транспорт-логистика, қишлоқ хўжалиги, энергетика, саноат кооперацияси, иқлим, рақамли ривожланиш ва соғлиқни сақлаш соҳаларидаги ҳамкорликнинг бугунги ҳолати ва истиқболларини атрофлича муҳокама қилдилар.
Бундан ташқари, маданий-гуманитар алоқаларни мустаҳкамлашга алоҳида эътибор қаратилди.
Президентлар минтақавий ва халқаро кун тартибидаги бир қатор долзарб масалалар юзасидан фикр алмашдилар.
Эслатиб ўтамиз, аввалроқ Президент Франция Республикасига давлат ташрифи билан боргани ҳақида ёзган эдик.
Бундан ташқари, Kazinform мухбири Қозоғистон ва Франция ўртасидаги муносабатларнинг мустаҳкамланишини ҳар томонлама ёритди.
Елисей саройида Қозоғистон Президенти Қасим-Жомарт Тоқаевни расмий кутиб олиш маросими бўлиб ўтди.
