Бу йил туркий дунёнинг маданий пойтахти деб эълон қилинган Ақтау шаҳрида қандай тадбирлар бўлиб ўтади
АQTAU. Кazinform – “Ақтау – Туркий дунёнинг маданий пойтахти” лойиҳаси доирасидаги тадбирлар 2025 йилнинг апрель ойида бошланиб, кузгача давом этади.
Бу даврда туркий тилли давлатлар ўртасидаги қардошлик, дўстлик ришталари ҳамда турк маданияти ва санъатини авлоддан-авлодга етказиш, дунёга танитиш мақсадида туркий тилли давлатлар санъаткорлари иштирокида кўплаб маданий тадбирлар ташкил этилади. Манғистау вилояти Маданият, тилларни ривожлантириш ва архив иши бошқармаси бошлиғи Нуртас Салининг айтишича, бу борада қизғин тайёргарлик ишлари бошланган.
Тадбирлар жадвали эълон қилинди. Шунга кўра, 5 апрель куни Ақтау шаҳрида “Ақтау – Туркий дунёнинг маданий пойтахти – 2025” тадбирининг очилиш маросими бўлиб ўтди. Тадбир ТУРКСОЙ халқаро ташкилоти, Қозоғистон Республикаси Маданият ва ахборот вазирлиги, Манғистау вилояти ҳокимлиги ва Ақтау шаҳри ҳокимлиги кўмагида ташкил этилди.
7-9 апрель кунлари “Туркий ритмда рақс” халқаро рақс танлови, 29 май куни “Туркий халқлар цивилизацияси ва унинг жаҳон маданияти тарихидаги ўрни” мавзуида халқаро илмий-амалий конференция ўтказилиши режалаштирилган.
Навбатда “Туркий дунё тотеми” халқаро конференцияси, “Қримнинг қирқ ботири” эпосига бағишланган туркий достонларнинг парад-фестивали, “Каспий — денгизи дўстлик” вокал ва чолғу ансамбллари фестивали ва туркий мамлакатлар фольклор ансамбллари ва чолғу асбоблари фестивали бўлиб ўтади.
15 июнь куни Нурғиса Тилендиев таваллудининг 100 йиллигига бағишланган “Манғистау мақомлари” Туркий дунё бастакорларининг фестивали бўлиб ўтади.
XXVI “ТУРКСОЙ опера кунлари” туркий мамлакатлар опера юлдузлари фестивали, «MODEL CUP» моделлар танлови, Туркий дунё ҳунармандларининг «Даламен үндес – баба өнер» (дашт билан уйғун боболар санъати) фестивали, VIII “Турк дунёси этно-мода шоуси” режалаштирилган.
«АҚ МАЯ FEST» шубат фестивали, «Жұмбақ бояулар» (“Сирли ранглар”) халқаро рассомлар ва ҳайкалтарошлар симпозиуми ва XXV “ТУРКСОЙ рассомларининг йиғилиши”, Абай таваллудининг 180 йиллиги доирасида ёш шоирлар ўртасида “Туркий шоирлар” 1-халқаро шеърият фестивали ўтказилади.
8-9 август кунлари С.Қондибай ижодига бағишланган IV Халқаро илмий-назарий конференция, шунингдек, С.Қондибай ижодига бағишланган анимацион фильмлар халқаро фестивали ташкил этилади.
«Өнерлі өрен»“Санъаткор болалар” халқаро болалар ижодиёти фестивали, «Мейірімді түркі әлемі» (“Меҳрибон туркий дунё”) имконияти чекланган болалар учун халқаро санъат фестивали, фотографлар фестивали, кино ва театр фестиваллари каби тадбирлар ўтказилади.
13-14 ноябрь кунлари XXXXII “Турксой Халқаро ташкилотига аъзо давлатлар Маданият вазирлари Доимий кенгашининг йиғилиши” ва “Ақтау – Туркий дунёнинг маданий пойтахти – 2025” тадбирининг ёпилиш маросими режалаштирилган.
Эслатиб ўтамиз, аввалроқ қозоғистонликлар ЮНЕСКОда ТУРКСОЙнинг 30 йиллигига бағишланган концертда чиқиш қилгани ҳақида хабар берган эдик.
