Қозоғистонликлар ЮНЕСКОда ТУРКСОЙнинг 30 йиллигига бағишланган концертда чиқиш қилди
ЮНЕСКОнинг Париждаги қароргоҳида Халқаро Туркий маданият ташкилоти (ТУРКСОЙ)нинг 30 йиллиги муносабати билан “Биз биргамиз” гала-концерти бўлиб ўтди. Юбилей тадбирини ўтказишда Озарбайжон, Қозоғистон, Қирғизистон, Туркманистон, Туркия ва Ўзбекистоннинг ЮНЕСКОдаги доимий делегациялари ёрдам кўрсатди, дея хабар беради Kazinform ҚР Ташқи ишлар вазирлиги матбуот хизматига таяниб.
ТУРКСОЙ Бош котиби Султон Раев тадбир иштирокчиларига қутлов сўзида ташкилот ўттиз йилдан буён ўз илдизлари муштарак, тиллари ва маданияти ўхшаш халқлар ўртасида “маънавий олтин кўприк” вазифасини изчил бажариб келаётганини таъкидлади.
Ўз навбатида, ЮНЕСКО Бош директори ўринбосари Энтони Охаменг-Боама ушбу ажойиб кечани ўтказиш ташаббуси учун ташкилотчиларга миннатдорлик билдириб, туркий тилли халқларнинг жаҳон маданиятига қўшаётган салмоқли ҳиссасини тарғиб этишда ТУРКСОЙнинг ролини алоҳида таъкидлади.
