Бишкекдаги тунги тартибсизликлар: 20 нафар полициячи жазоланди, ундан 10 нафари ишдан бўшатилди
BISHKEK. Kazinform – 18 майга ўтар кечаси Бишкекда хорижлик талабалар ва меҳнат муҳожирларига уюштирилган ҳужум билан тартибсизликларга айланган акциядан сўнг 20 нафар полициячи интизомий жавобгарликка тортилди, ундан 10 нафари ишдан бўшатилди, деб хабар беради Кazinform мухбири.
Вазирлик маълумотларига кўра, 27 май куни Бишкекда 13 ва 17 май кунлари содир бўлган тунги тартибсизликлар ва хорижликларга ҳужумлар бўйича Ички ишлар вазирлигининг коллегияси бўлиб ўтган. Унда Ички ишлар вазирлиги, Бишкек шаҳар ички ишлар бошқармаси, пойтахт туманлари ички ишлар бошқармалари раҳбарияти ҳамда ҳуқуқ-тартиботни таъминлаш вазифалари бўлган ички ишлар органлари ходимлари иштирок этди.
Хизмат текшируви натижаларига кўра, Қирғизистон Республикаси ИИВ коллегияси қарори билан Бишкек шаҳрининг Свердловск тумани ИИБнинг 10 нафар ходими, жумладан, бўлинма бошлиғи эгаллаб турган лавозимидан озод этилди. Бундан ташқари, Бишкек шаҳар ички ишлар бошқармаси ва Свердловск туман ИИБнинг 10 нафар ходими турли турдаги интизомий жавобгарликка тортилди.
2024 йил 13 майда тергов-тезкор гуруҳи таркибига кирган ходимларга нисбатан ўтказилган хизмат тергови қарори ҳуқуқий баҳо бериш учун ИИВ Тергов хизматига ўтказилган.
Эслатиб ўтамиз, 18 майга ўтар кечаси Бишкекда 13 май куни ётоқхоналардан бирида маҳаллий аҳоли ва хорижлик фуқаролар ўртасида содир бўлган оммавий муштлашув оқибатида тартибсизликларга айланган акция бўлиб ўтган эди. Воқеадан сўнг зудлик билан 29 киши тиббий ёрдамга мурожаат қилган, шундан 15 нафари пойтахтдаги тиббиёт муассасаларига етказилган. Кейинчалик жабрланганлар сони 41 нафарга етди. Тўполон фактлари бўйича жиноий ишлар қўзғатилиб, хорижликларга нисбатан талончиликда гумон қилинган шахслар қўлга олинди.
Муаллиф: Гулмира Абдраҳманова
