Бир ой ичида 800 мингга яқин қозоғистонлик ЎРВИ билан касалланган

ASTANA. Кazinform - Жорий йилнинг 1 октябридан буён Қозоғистонда 764 247 нафар ЎРВИ ва 521 нафар грипп ҳолатлари қайд этилган. Бу ҳақда ҚР Соғлиқни сақлаш вазирлиги Санитария-эпидемиология назорати қўмитасининг юқумли касалликлар устидан эпидемиологик назорат бошқармаси бошлиғи Роза Қожапова маълум қилди, деб хабар беради Kazinform мухбири.

«Мамлакатимизда ЎРВИ ва грипп тарқалишининг мониторинги ҳар йили 1 октябрдан бошланади ва кейинги йилнинг 30 апрелигача амалга оширилади. Бу йил эпидемия мавсуми бошидан буён ЎРВИ билан касалланган 764 247 та ҳолат қайд этилган. Кўрсаткич ўтган йили ҳам шу даражада эди. Мамлакат бўйлаб 521 та лаборатория томонидан тасдиқланган грипп ҳолати қайд этилган. Вилоятлар бўйича Қизилўрда вилояти – 128, Жетису вилояти – 84, Ақтўбе вилояти – 69 та ҳолат билан дастлабки учликдан жой олган», - деди Роза Қожапова Марказий коммуникациялар хизмати майдонида ўтказилган матбуот анжуманида.

Соғлиқни сақлаш вазирлиги вакилининг сўзларига кўра, гриппдан ташқари шунга ўхшаш вируслар ҳам бутун мамлакат бўйлаб тарқалмоқда.

«1202 та намуна гриппга ўхшаш инфекциялар учун текширилди. Улардан 254 таси (21,1%) намуналари тасдиқланган. Вирусларга келсак, риновирус - 93, РС вируси - 77, парагрипп - 31, коронавирус - 20, аденовирус - 17, бокавирус - 10, метапневмовирус – 6 та», - деди у.

Эслатиб ўтамиз, аввалроқ ЎРВИ билан касалланганларнинг 30 фоизи бир синфда қайд этилган бўлса, таълим онлайн форматга ўтказилади .

Шунингдек, мазкур вазирлик хабарига кўра, қозоғистонликларнинг 9,5 фоизи гриппга қарши эмланган.

Муаллиф: Даулет Изтилеу