Автомобиль ишлаб чиқаришнинг ярми Алмати ҳиссасига тўғри келади: қолгани қайси ҳудудда
ASTANA. Kazinform — Қозоғистонда енгил автомобиллар ишлаб чиқариш ҳажми ошди. 2026 йилнинг январь-сентябрь ойларида 136 548 та енгил автомобиль ишлаб чиқарилди. Бу 2025 йилнинг шу даврига нисбатан 38 фоизга кўп.
Миллий статистика бюроси матбуот хизмати маълумотларига кўра, сентябрь ойида 19 377 та енгил автомобиль ишлаб чиқарилган. Ишлаб чиқариш ҳажми ўтган йилнинг шу ойига нисбатан 66,4 фоизга, жорий йилнинг август ойига нисбатан эса 35,5 фоизга ошган.
“Қозоғистонда автомобиль ишлаб чиқариш билан 12 та корхона шуғулланади. Енгил автомобиллар ишлаб чиқаришнинг асосий қисми Алмати шаҳри ва Қостанай вилояти ҳиссасига тўғри келади. Уларнинг улуши мос равишда 50,5 ва 49,5 фоизни ташкил этади”, — дейилади статистик маълумотларда.
2026 йилнинг январь-сентябрь ойларида «Автомобиллар, тиркамалар ва ярим тиркамалар» тоифаси бўйича саноат маҳсулотлари ишлаб чиқариш ҳажми пул ифодасида 1,67 триллион тенгега етди. Ушбу тоифа бўйича саноат ишлаб чиқариш индекси ўтган йилнинг шу даврига нисбатан 129,9 фоизни ташкил этди.
2026 йил сентябрь ойида ишлаб чиқарилган маҳсулотлар ҳажми 198,4 миллиард тенгега тенг бўлди. Пул ифодасидаги ушбу кўрсаткич 2026 йил август ойига нисбатан 25,7 фоизга, 2025 йил сентябрь ойига нисбатан эса 10,5 фоизга ошди.
