Астана ва Алмати ICCA рейтингида ТОП-5 туристик шаҳарлар қаторига кирди

ASTANA. Kazinform – Қозоғистон МДҲ давлатлари орасида ишбилармонлик туризми етакчиларидан бирига айланди. Икки халқаро ташкилот вакиллари мамлакатга ташриф буюриб, ички туризм ҳолати билан танишди, дея хабар беради Kazinform Kazakh Tourism миллий компанияси матбуот хизматига таяниб.

Халқаро конгресслар ва конференциялар уюшмасининг (ICCA) Европа бўйича минтақавий менежери Эфи Кудели ҳамда IMEX Frankfurt халқаро кўргазмаси вакили Лиз Бранд бошчилигидаги халқаро тадбирлар ташкилотчилари ва ОАВ вакиллари Астана ва Алмати шаҳарларида бўлди.

Делегация қозоғистонлик ҳамкорлар ва туризм бизнеси вакиллари билан ҳамкорлик ва халқаро тадбирларни ўтказиш юзасидан учрашув ўтказди. Йиғилишда меҳмонхоналар вакиллари, тадбир ўтказиладиган жойни бошқарувчи компаниялар раҳбарлари ва туроператорлар иштирок этди.

Ушбу ассоциациянинг статистик маълумотларига кўра, 2013 йилдан 2022 йилгача бўлган даврда Қозоғистонда августдан октябргача 50 дан 500 гача делегациялар иштирокида тадбирлар ўтказилган.

«Европа минтақавий менежери сифатида бу менинг биринчи ташрифим. Саёҳат давомида туризм ҳамжамиятининг вакиллари билан учрашганимдан, Марказий Осиёда халқаро тадбирларни ўтказишда етакчи шаҳарлардан бири ҳисобланган Астана ва Алмати шаҳарларининг ишбилармонлик туризми инфратузилмаси билан танишишдан хурсанд бўлдим», – дейди халқаро конгресслар ва конференциялар Ассоциациясининг (ICCA) Европа бўйича минтақавий менежери Эфи Кудели.

ICCAнинг ўтган йилги мамлакатлар ва шаҳарлар рейтингида Қозоғистон Грузия ва Озарбайжондан кейин учинчи ўринни эгаллади. Ўтказилган халқаро тадбирлар сони бўйича минтақанинг бешта давлати орасида учинчи ўринда туради (Алмати учинчи, Астана бешинчи).

2019 йилда MICE саноати мамлакатга 1 триллион АҚШ доллари сармоя киритди, 10 миллион иш ўрни яратилди ва 1,5 миллиардга яқин сайёҳни жалб этди. Бу шуни кўрсатадики, ишбилармонлик туризми оддий хусусий туризмга қараганда 3 баробар кўпроқ фойда келтиради. Қозоғистонда MICE қўллаб-қувватлаш дастури барқарор молиялаштирилган тақдирда минтақада ишбилармонлик туризмини илгари суриш бўйича етакчи бўлиш учун барча имкониятлар мавжуд.

Таъкидлаш жоизки, MICE саноати бизнес туризм индустриясининг турли корпоратив ва бизнес тадбирларини ташкил этиш ва ўтказиш билан боғлиқ бўлган тармоғи.

ICCA (International Congress and Convention Association) халқаро учрашувлар саноати учун глобал ҳамжамият ва билим маркази.