Андрей Голубев Словакиядаги мусобақанинг ярим финалига чиқди

Қозоғистонлик теннисчи Андрей Голубев Словакия пойтахти Братислава шаҳридаги челленжер мусобақасининг ярим финалига йўл олди, деб хабар беради Kazinform агентлиги.

Мусобақанинг 3-ракеткаси сифатида рўйхатдан ўтган А.Голубев украиналик Денис Молчанов билан иккита учрашувни муваффақиятли якунлади.

Дастлаб қозоқ-украина дуэти грециялик Петрос Циципас ва голландиялик Сэм Вербекни 7:6 (7:2), 6:4 ҳисобида мағлуб этди.

Иккинчи ўйин эса янада кескин курашларга бой бўлиб, 2 соату 10 дақиқа давом этди. Голубев-Молчанов беларуслик Иван Лютаревич – украиналик Владислав Манафовни 6:7 (7:9), 7:6 (7:3), 17:15 ҳисобида мағлуб этди.

Қозоғистон-Украина жуфтлиги ушбу мусобақа давомида 8 та эйс амалга оширди ва 5 брейк-пойнтдан 2 тасини қайд этди. Уларнинг ярим финалдаги рақиблари кейинроқ маълум бўлади.

Эслатиб ўтамиз, аввалроқ Денис Евсеев Хитойдаги турнирда 1/8 финалга чиққани ҳақида ёзган эдик.