АҚШда чўчқанинг юраги қўйилган дунёдаги иккинчи бемор вафот этди

АҚШда 58 ёшли Лоуренс Фосетт операциядан олти ҳафта ўтиб вафот этди. У чўчқа юраги имплантация қилинган дунёдаги иккинчи бемордир, деб хабар беради Каzinform агентлиги Мэриленд университетининг тиббиёт марказига таяниб.

“Биз даволаб бўлмайдиган юрак касаллигига чалинган ва генетик жиҳатдан ўзгартирилган чўчқа юрагини трансплантация қилиш бўйича дунёда иккинчи операция амалга оширилган 58 ёшли Лоуренснинг ўлимини эълон қиламиз. У 20 сентябрь куни операция қилинди ва деярли олти ҳафта яшади”, – дейилади хабарда.

Бемор 14 сентябрь куни юрак етишмовчилиги ташхиси билан тиббиёт марказига ётқизилган. Шифокорлар бошиданоқ уни анъанавий трансплантация усуллари билан операция қилиш мумкин эмаслигини тан олишган. Бироқ 15 сентабрь куни АҚШ озиқ-овқат ва фармацевтика идораси беморнинг умрини узайтиришга ёрдам берадиган операцияга шошилинч рухсат берди.

Университет беморнинг юраги трансплантация қилинганидан кейинги биринчи ойда жуда яхши ишлаганини қайд этди. Кейинчалик у физиотерапия курсидан ўтди ва яна юришни ўрганишга ҳаракат қилди. Бироқ, шифокорлар унинг сўнгги кунларида юракни рад этиш белгиларини пайқашди ва у охир-оқибат вафот этди.

Эслатиб ўтамиз, аввалроқ Мэриленд университетида иккинчи марта генетик жиҳатдан ўзгартирилган чўчқа юраги одамга кўчириб ўтказилгани ҳақида ёзган эдик.