Афғонистоннинг Ҳирот аэропортига Қозоғистондан келган гуманитар самолёт қўнди
Қозоғистон халқи номидан Афғонистон ғарбидаги зилзиладан жабр кўрган аҳолига инсонпарварлик ёрдамининг биринчи партиясини олиб кетаётган махсус самолёт Ҳирот аэропортига қўнди, деб хабар беради Kazinform агентлиги.
Гуманитар юкни Афғонистон Фуқаролик аэропортлари департаменти бош директори, Зилзила оқибатларини бартараф этиш штаб-квартираси аъзоси Гаврал Абдул Салтанат бошчилигидаги гуруҳ қабул қилди. Ходимнинг айтишича, Қозоғистон Эрон ва Туркиядан кейин ёрдам берган учинчи давлатдир.
“Аввало, ушбу оғир дамда бизга ёрдам берган Қозоғистон халқига, жаноб Қасим-Жомарт Тоқаевга миннатдорчилик билдирамиз. Юкни қабул қилиб олгандан сўнг махсус комиссия маслаҳатлашиб, уни қаерга жўнатишни ҳал қилади. Ҳозир марҳумларни дафн этишга, жароҳатланганларга биринчи тиббий ёрдам кўрсатишга муваффақ бўлдик. Яна қурбонлар аниқланса, бунга тайёрмиз. Бугун эрталаб соат 5:00 да қозоғистонлик қутқарувчилар ишлаётган ҳудудда яна зилзила содир бўлди. Яна бир бор Қозоғистон халқига шундай оғир вақтда ёрдам юборгани учун миннатдорчилик билдирамиз”, – деди штаб вакили.
Аввал хабар берганимиздек, Миллий гвардиянинг Y8F200W самолётига Астана, Алмати ва Чимкент шаҳарларидан 1200 кишини жойлаштириш учун 70 та чодир ва умумий оғирлиги 6 тоннадан ортиқ дори-дармонлар юкланган эди. Ушбу дори-дармонлар рўйхати Афғонистон томони сўраган рўйхатга мувофиқ тузилган. Хусусан, иситмани туширувчи, яллиғланишга қарши дори воситалари ва азитромицин, ибупрофен, цефтазидим, парацетамол каби антибиотиклар етказиб берилди.
Зилзила оқибатларини бартараф этиш бўйича штаб вакили Гарвал Абдул Салтанатнинг айтишича, Ҳирот вилоятидаги зилзила оқибатида вайрон бўлган 13 та аҳоли пункти аҳолиси ҳамон чодир, тиббий буюмлар ва дори-дармонларга муҳтож.
Эслатиб ўтамиз, 7 октабр куни Афғонистон ғарбидаги Ҳирот провинциясида содир бўлган 6,3 магнитудали зилзила оқибатида 2053 киши ҳалок бўлган, 9000 дан ортиқ киши жароҳатланган эди.
Бундан олдин Қозоғистон Афғонистонга инсонпарварлик ёрдами етказиши хабар қилинганди.
Шу билан бирга вайроналар остида қолган одамларни қутқариш учун Афғонистонга ўт ўчирувчилар, жумладан кинологлар ҳам юборилади.
ҚР Ташқи ишлар вазирлиги расмий вакили Айбек Смадияровнинг сўзларига кўра, Афғонистондаги зилзиладан Қозоғистон фуқаролари жабр кўрмаган.
