39 ёшли бемор Кенияда 5 октябрь куни вафот этган биринчи беморнинг қариндошидир.
Эркак карантинга олинганлар орасида эди. Унда 13 октябрь куни Эбола аломатлари пайдо бўлди.
ЖССТнинг Кениядаги вакили Нима Русибамайила Кимамбо БМТ Янгиликлар хизматига берган интервьюсида ҳукуматнинг биринчи ҳолат билан алоқада бўлганларни аниқлаш ва карантинга олиш бўйича саъй-ҳаракатларини олқишлади.
— Аммо бу касалликни енгиш фақат ҳукумат ёки ҳамкорларимизга боғлиқ эмас - бу ҳар биримизга боғлиқ, — деб таъкидлади у. — Ҳар кимнинг ўз роли бор ва агар ҳамма ўз ҳиссасини қўшса, биз касалликнинг тарқалишини тўхтата оламиз.
Кениядаги биринчи Эбола қурбони Конго Демократик Республикасида яшовчи мамлакат фуқароси бўлган. Конго Демократик Республикаси шарқий қисмида мисли кўрилмаган эпидемия тарқалишда давом этмоқда.
Эркак 3 октябрь куни Уганда орқали Кенияга борган ва икки кундан кейин пойтахт Найробидаги касалхонада вафот этган.
Кимамбо соғлиқни сақлаш идораларини бемор билан парвоз пайтида ҳам, келганидан кейин ҳам алоқада бўлган одамларни кузатишда "имкон қадар кенг қамров"ни таъминлагани учун мақтади.
Рўйхатга 40 дан ортиқ киши киритилган: йўловчилар ва экипаж аъзолари, салон тозаловчилари, аэропорт ходимлари, иммиграция ходимлари, тиббиёт ходимлари ва оила аъзолари.
Уларнинг аксарияти карантинда, бир нечта паст хавфли шахслар эса мутахассислар назорати остида ўзини изоляция қилмоқда. Айни пайтда, ҳали топилмаган олти йўловчини топишга ҳаракат қилинмоқда (улар хорижий телефон рақамларидан фойдаланмоқда).
Кимамбо ҳозирда саёҳат чекловларини қўллаш ёки давлат чегараларини ёпишга ҳожат йўқлигини таъкидлаган бўлса-да, у касаллик аломатлари бўлиши мумкин бўлган саёҳатчиларни аниқлаш учун текширув ўтказиш муҳимлигини таъкидлади.
Эслатиб ўтамиз, Кенияда Эбола карантин марказини очишга қарши норозилик намойишида икки киши ҳалок бўлди.