Жозеп Боррель: Қозоғистон Марказий Осиёда энг жадал ривожланаётган иқтисодиётга эга
Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррель Каzinform агентлиги мухбири билан Қозоғистон Республикаси Транспорт вазирлиги ва Европа инвестиция банки ўртасида 500 миллион евролик ўзаро англашув меморандуми имзолангани ҳақидаги ўзининг фикри билан ўртоқлашди. Унинг сўзларига кўра, бу Қозоғистон ва Европа Иттифоқининг иқтисодий яқинлашишига хизмат қилади.
Европа дипломатияси раҳбари Марказий Осиё ва Европа Иттифоқи ўртасидаги транспорт алоқаси бўйича Инвесторлар форумининг очилишида иштирок этди.
“Бугун Брюссельда бўлиб ўтган Марказий Осиё ва Европа Иттифоқи ўртасидаги транспорт алоқаси бўйича биринчи «Global Gateway» Инвесторлар форуми доирасида Қозоғистон Республикаси Транспорт вазирлиги ва Европа инвестицияси банки ўртасида 500 миллион евро миқдоридаги ўзаро англашув меморандуми имзоланганидан хурсандман”, – деди Европа дипломатияси раҳбари.
“Бу Қозоғистон ва Европа Иттифоқининг иқтисодий яқинлашувига ҳисса қўшади”, – деди Жозеп Боррель.
Унинг таъкидлашича, Европа пойтахтида имзоланган меморандум Транскаспий халқаро транспорт йўналишини янада ривожлантиришга қаратилган бўлиб, бу Европа Иттифоқи давлатлари ва Марказий Осиё ўртасидаги транзит салоҳиятини ошириш имконини беради.
Ҳужжат Қозоғистон Республикасида Европа ва Марказий Осиё ўртасидаги барқарор транспорт алоқалари мақсадларига эришишга ҳисса қўшадиган лойиҳаларни молиялаштириш имкониятини назарда тутади.
Бундан ташқари, Брюссельда Қозоғистон тараққиёт банки ва Европа инвестиция банки ўртасида 320 миллион евро миқдоридаги ўзаро англашув меморандуми имзоланди.
Эслатиб ўтамиз, Брюссельда Европа ва Марказий Осиё ўртасида барқарор транспорт йўлакларини ривожлантириш бўйича «Global Gateway» сармоявий форуми доирасида Қозоғистон ва европалик шериклар ўртасида умумий қиймати 800 миллион евродан ортиқ бўлган тўртта ҳужжат имзоланган эди.
