Жорий йилнинг баҳорида Астана шаҳрида шахмат бўйича жаҳон чемпионати бўлиб ўтади

ASTANA. Kazinform – ҚР Маданият ва спорт вазири Асхат Оралов куни кеча Халқаро шахмат федерацияси (FIDE) президенти Аркадий Дворкович бошчилигидаги расмий делегация билан учрашди. Учрашувда жорий йилнинг баҳорида Астана шаҳрида шахмат бўйича бўлиб ўтадиган жаҳон чемпионатини ташкил этиш ва бошқа бир қатор муҳим масалалар муҳокама қилинди, деб хабар беради Kazinform.

Шунингдек, Қозоғистонда FIDE ҳомийлигида бошқа тадбирларни ўтказиш масаласи ҳам муҳокама қилинди. Масалан, жаҳоннинг энг яхши ўсмирлари иштирокидаги турнир ва қозоғистонлик ёш шахматчилар иштирокидаги тадбирлар.

«Бу бизнинг ёш чемпионларимиз учун қимматли тажриба бўларди. Қайд этишни истардимки, мамлакатимиз FIDE томонидан тасодифан танланмаган. Бугун мамлакатимиз тўғри маънода шахматнинг ҳақиқий гуллаб-яшнашини бошдан кечирмоқда. Давлат раҳбари Қасим-Жомарт Тоқаев мамлакатда шахмат ҳаракати ривожини шахсан кузатиб бормоқда. 2022 йилда мамлакатимизда 7618 та секцияда 253 мингдан ортиқ киши шахмат билан мунтазам шуғулланган. Янги ўқув йилидан бошлаб 28 мингга яқин болани қамраб олган 654 та мактабда «шахмат» фани ихтиёрий фан сифатида жорий этилди», - деб ёзди вазир ўзининг Facebook саҳифасида.

Унинг таъкидлашича, қозоғистонлик ёш шахматчилар жаҳоннинг энг яхши шахматчилари қаторидан жой олган – Динара Садуақасова, Жансая Абдималик, Бибисара Асаубаева ва бошқа спортчилар.

Кузда Президент Қасим-Жомарт Тоқаев FIDE раҳбари билан учрашиб, мамлакатдаги Халқаро шахмат федерацияси билан ҳамкорлик истиқболларини муҳокама қилди.

«Бу борадаги ишларни давом эттирамиз», – дейди Асхат Оралов.