Жорий йилда Қозоғистонда 234 минг киши пневмония билан касалланган

«Жорий йилнинг 1 январидан 15 июлига қадар Қозоғистонда 234 187 киши пневмонияга чалинган. Бу ўтган йилдагига нисбатан 3,3 баравар кўп (70 926 киши)», - деди Алексей Цой.

Вазирнинг таъкидлашича, ушбу маълумот пневмониянинг барча турларини тавсифлайди.

«Бу стафилококк, стрептококк, пневмококк, клебсиелла ва бошқа касаллик қўзғатувчилар орқали тарқалган бактериал пневмония (45 824 ҳолат ёки 19,6%), аденовирус, риновирус пневмонияси, шунингдек параинфлюза вируси, метапневмовируслар ва бошқа яхши ўрганилган вируслар сабаб бўлган пневмония. Бундан ташқари аниқланмаган вирусли пневмония ҳам бор. Яъни ковидга ўхшаш вируслар туфайли келиб чиққанлигини истисно қилмаяпмиз», - деди у.

Алексей Цойнинг хабар беришича, Қозоғистонда 1 январьдан 15 июльгача 3 327 киши пневмониядан вафот этган (2019 йилда - 1886 та ҳолат).

Эслатиб ўтамиз, бунгача вазир пневмония ва коронавирус юқтириш ҳолатлари статистикаси бирлаштирилишини маълум қилганди.