Жорий йилда Қозоғистонда 1,5 миллиард долларлик инвестиция лойиҳалари ишга туширилади
ASTANA. Kazinform – Жорий йилда мамлакатда 1,5 миллиард долларлик инвестиция лойиҳалари ишга туширилади. Бу ҳақда Мажилиснинг Халқаро ишлар, мудофаа ва хавфсизлик қўмитаси йиғилишида ҚР Ташқи ишлар вазири ўринбосари Назира Нурбаева маълум қилди.
“2024 йилда умумий қиймати 1,5 миллиард АҚШ долларидан ортиқ бўлган 40 га яқин хорижий инвестиция лойиҳасини фойдаланишга топшириш кутилмоқда. Улар орасида “Буғити” вольфрам конини ўзлаштириш, Алмати вилоятида йилига 3,3 миллион тонна вольфрам рудасини қайта ишлаш қувватига эга тоғ-конни қайта ишлаш комбинатини қуриш каби муҳим лойиҳалар бор. Лойиҳа Хитойнинг Jiaxin International Resources компанияси иштирокида амалга оширилмоқда”, – деди у.
Вазир ўринбосари тақдим этган маълумотларга кўра, Россиянинг “ТехноНиколь” компанияси Алмати вилоятида иссиқлик изоляцион материаллар ишлаб чиқаришни йўлга қўймоқчи. Италиянинг “Cormatex” компанияси Ақтўбе вилоятида тўқима эмас материалларни ишлаб чиқариш корхонасини ишга туширишни режалаштирмоқда.
Бундан ташқари, Назира Нурбаева ўтган йили Давлат раҳбарининг фармойиши билан маҳаллий ва хорижий инвесторларнинг нонефть сектори лойиҳаларидан иборат инвестисия лойиҳалари миллий жамғармаси шакллантирилганини таъкидлади. Бугунги кунда у умумий қиймати қарийб 25,4 триллион тенгега тенг 609 та лойиҳадан иборат бўлиб, 115 мингдан ортиқ иш ўрни яратишни мақсад қилган. Улардан хорижий инвесторлар иштирокида 14 триллион тенгелик 106 та, 11,2 триллион тенгелик 503 та лойиҳа амалга оширилмоқда.
