Жетисайлик фермерлар Россияга 80 тонна карам жўнатишди

TÚRKİSTAN. Kazinform – Жетисай туманининг Интимақ овул округида жойлашган «Комилжон» фермер хўжалиги карамнинг биринчи маҳсулотларини қўшни Россияга экспорт қилди, деб хабар беради Kazinform мухбири.

Феврал ойида фермер Комилжон Дадаев 12 гектар майдонга карамнинг «Пекин», «Магнус», «Зарисма» эртапишар навларини экди. Айни пайтда карамнинг далада 50 кунда пишадиган «Пекин» нави ҳосил бермоқда.

«Бугунги кунда 2 гектар майдондан етиштирилган маҳсулот ҳажми 80 тоннани ташкил этмоқда. Харажатларимиз тўлиқ ўзини оқлади, дейишимиз мумкин. Карамни қўшни Россия пойтахти Москвада сотяпмиз», - дейди «Комилжон» фермер хўжалиги раиси Комилжон Дадаев.

Жорий йилда Жетисай туманида 900 гектар майдонга эрта карам экиб, 30 минг тонна ҳосил олиш режалаштирилган. Экилган маҳсулотларнинг асосий қисми «Зарисма», «Валикор», «Магнус», «Кевин Фарао», «Пекин», «Ринда», «Заказ» навлари.

«Ўтган йили туман фермерлари минг гектардан ортиқ майдонга карам экиб, 31,5 минг тонна ҳосил олди. Эртапишар карамнинг асосий қисми Россия, Беларусь ва Европа мамлакатларига экспорт қилинади», – дейди Жетисай тумани қишлоқ хўжалиги ва ер муносабатлари бўлими бош мутахассиси Нуртас Турсинбеков.