Жанубий Кореянинг собиқ президенти Пак Кин Хе афв этилди

NUR-SULTAN. Кazinform - Коррупция ва мансаб ваколатини суиистеъмол қилишда айбланиб 22 йилга озодликдан маҳрум этилган собиқ президент Пак Кин Хе Корея Республикаси ҳукумати томонидан афв этилади. Бу ҳақда жума куни Yonhap агентлиги хабар берди.

Агентлик маълумотларига кўра, 69 ёшли Пак Кин Хе янги йил арафасида афв этиладиган шахслар рўйхатига киритилган. Қарор унинг соғлиғи ҳолатини инобатга олган ҳолда гуманитар сабабларга кўра қабул қилинган. 2019 йилда Пак Кин Хе елкасида жарроҳлик амалиётини ўтказди, бу йил эса собиқ президент елка ва умуртқа поғонаси сурункали касалликлари туфайли уч марта касалхонага ётқизилди.

Пак Кин Хе билан боғлиқ сиёсий можаро 2016 йил октябр ойида унинг дўсти Чхве Сун Сильнинг давлат раҳбарига таъсири ҳақидаги маълумотлар матбуотда пайдо бўлгач, авж олди. Жанжал юзасидан ўтказилган тергов шуни кўрсатдики, у бир неча йил давомида ҳукумат тафсилотларидан хабардор бўлиб, сиёсий қарорлар қабул қилиш билан шуғулланган. Президентнинг дўсти ҳам бир қатор компанияларга босим ўтказиб, унинг холдингларига ўн миллионлаб долларларни ўтказишга мажбур қилган.

Коррупция фош этилиши ва Чхве Сун Сильнинг давлат хизматига ноқонуний аралашуви ортидан бутун мамлакат бўйлаб кенг кўламли норозилик намойишлари тўлқини авж олди, иштирокчилар президентнинг зудлик билан истеъфосини талаб қилишди. Пак Кин Хе Парламент томонидан ишдан бўшатилиб, кейинроқ ҳибсга олинган.

Жанубий кореялик экспертларнинг фикрича, собиқ етакчининг озод этилиши келаси март ойида бўлиб ўтадиган президентлик сайловларига таъсир қилади.