Жанубий Корея илм-фан соҳасига хорижликларни жалб қилиш учун 185 миллион доллардан ортиқ сармоя киритади

Сеул мэри О Се Хун томонидан эълон қилинган режа Сеулда хорижлик аҳоли сонининг кўпайиши, яъни 440 000 киши, пойтахт умумий аҳолисининг 4,7 фоизини ташкил қилган бир пайтда амалга оширилмоқда. Бу хорижликларни шаҳар ишчи кучига интеграция қилиш заруратини оширади.
Лойиҳа етакчи университетлар билан ҳамкорликда фан ва муҳандислик соҳасида магистр ёки докторлик даражасига эга бўлган мингга яқин хорижликларни жалб этиш ва хорижий истеъдодлар орасида талабга эга бўлган 100 та глобал компанияларни Сеулга кўчиб ўтишга ундашга қаратилган.
Шаҳар, шунингдек, 2030 йилгача Сеул марказида инглиз ва корейс тилларида хизматлар кўрсатувчи стартапларни қўллаб-қувватлаш марказини ташкил этишни режалаштирмоқда ва Сеулда ҳамда кенгроқ Осиё бозорида кенгаймоқчи бўлган 100 дан ортиқ хорижий стартапларни қабул қилишни мақсад қилган.
Режа шунингдек, тўғридан-тўғри хорижий инвестицияларни жалб қилиш ва Сеулдаги халқаро талабаларга стартаплар ва сунъий интеллект компанияларида иш топишда ёки ўз стартапларини яратишда ёрдам беришни ўз ичига олади.
Беш йиллик режанинг яна бир йўналиши – қариялар парвариши, болалар парвариши, озиқ-овқат хизмати ва меҳмондўстлик каби ишчи кучи танқислигига дуч келган соҳаларга хорижий ишчиларни жалб қилишдир.
Чет эллик ишчиларни сақлаб қолиш учун шаҳар маъмурияти уларга Жанубий Корея фуқароларига бериладиган оналик ва бола парвариши бўйича нафақалар беришни ҳам режалаштирмоқда.
“Сеул дунёнинг энг яхши бешта шаҳарларидан бирига айланиши учун у чет эллик ишчилар ва компанияларни фаол жалб қилувчи ҳамда уларнинг ғоялари, капитали ва салоҳиятидан тўлиқ фойдаланадиган янада инклюзив шаҳарга айланиши керак”, - деди О Се Хун.