Жамоавий жазо: БМТ вакили Исроилнинг касалхоналарга қилган ҳужумларини қоралади

Қўриқланадиган касалхоналарга ҳужум қилиш халқаро гуманитар ҳуқуқни бузиш ҳисобланади. Бу ҳақда Аnadolu агентлиги саволига жавоб берган БМТ Инсон ҳуқуқлари бўйича Олий комиссари бошқармаси расмий вакили Элизабет Тросселл маълум қилди, деб хабар беради Kazinform.

Тросселлнинг айтишича, жамоавий жазо амалиёти ҳам халқаро ҳуқуқни бузади.

У шу муносабат билан Ғазо сектори аҳолиси асосий озиқ-овқат ва хизматлардан фойдаланиш имкониятидан маҳрум бўлганини эслатди.

Исроил-Фаластин зиддиятлари

7 октябрь куни эрталаб ХАМАСнинг “Иззаддин ал-Қассам бригадалари” ҳарбий қаноти Исроилга қарши “Ал-Ақсо тўфони” операцияси бошланганини эълон қилди. Ғазо секторидан Исроил томон минглаб ракеталар отилди, қуролли гуруҳлар Исроил аҳоли пунктларига бостириб кирди.

ХАМАСнинг айтишича, операция босиб олинган Шарқий Қуддусдаги Ал-Ақсо масжидига уюштирилган ҳужум ва исроиллик жойлашувчилар томонидан фаластинликларга нисбатан зўравонликларнинг кучайиши муносабати билан амалга оширилган.

Бунга жавобан Исроил армияси Ғазо секторида ХАМАСга қарши ўнлаб қирувчи самолётлардан фойдаланган ҳолда “Темир қиличлар” операциясини бошлашини маълум қилди.

Исроил-Фаластин можароси бошланганидан бери 8500 дан ортиқ фаластинлик ҳалок бўлди. Расмий маълумотларга кўра, ҳалок бўлган фаластинликларнинг деярли 70 фоизи аёллар ва болалардир.

Исроилда қурбонлар сони 1500 кишидан ошди.

Ғазо секторининг 2,3 миллион аҳолиси Исроилнинг ҳаводан оммавий бомбардимон қилишлари ва анклавнинг тўлиқ блокадаси туфайли озиқ-овқат, сув ва дори-дармон танқислигидан азият чекмоқда.

БМТ Бош Ассамблеяси гуманитар юкларни етказиб беришга рухсат бериш учун зудлик билан ўт очишни тўхтатишга чақирди. Айни пайтда Иордания таклиф қилган резолюцияни 120 давлат қўллаб-қувватлади. Бироқ Исроил бу таклифни рад этди.