Ўзбекистонда 12 ёшдан катта болаларни эмлашга рухсат берилди

TASHKENT. Kazinform – Ўзбекистонда 12 ёшдан ошган болаларни коронавирусга қарши эмлашга рухсат берилди, дея хабар беради Kazinform мухбири Соғлиқни сақлаш вазирлигига таяниб.

Вазирлик маълумотларига кўра, Бош давлат санитария врачи ва Миллий техник иммунологик экспертиза ўртасидаги келишувга мувофиқ, 12 ёшдан ошган болалар Pfizer вакцинасини ота-онаси ёки васийларининг рухсати билан ихтиёрий тарзда олишлари мумкин.

«12-15 ёшли болалар учун Pfizer вакцинасининг клиник синовлари яхши натижаларни кўрсатди. Худди шундай тавсия Жаҳон соғлиқни сақлаш ташкилоти томонидан ҳам берилган «, - дейилади Соғлиқни сақлаш вазирлиги баёнотида.

Вазирлик маълумотларига кўра, сентябр ойининг ўрталарида мамлакатга 1,2 миллион доза Pfizer вакцинаси етказиб берилган. Бу Ўзбекистонда фойдаланиш учун тасдиқланган бешинчи вакцинадир.

Эслатиб ўтамиз, Ўзбекистонда эмлаш кампанияси 1 апрелдан бошланган. Эмлаш AstraZenecа, ZF-UZ-VAC2001, Спутник-V, Moderna ва Pfizer вакциналари ёрдамида амалга оширилади. Бугунги кунга қадар мамлакатда 4 миллион киши тўлиқ эмланган.

Муаллиф: Мадибек Жанибеков