Ўзбекистон яқин беш йил ичида сайёҳлар оқимини 9 млн кишига етказмоқчи
SAMARQAND. Kazinform – Ўзбекистон яқин беш йил ичида сайёҳлар сонини 9 миллион нафарга етказмоқчи. Бу ҳақда Самарқандда «Буюк ипак йўли» халқаро сайёҳлик марказининг очилиш маросимидаги нутқи чоғида Ўзбекистон Президенти Шавкат Мирзиёев маълум қилди, деб хабар беради Kazinform мухбири.
«3-4 йил аввал Самарқандга келган маҳаллий ва хорижий сайёҳлар сони 500 минг кишидан ошмасди. Айни пайтда туризмни ривожлантириш борасидаги ислоҳотларимиз, қулай сармоявий муҳит яратиш борасидаги саъй-ҳаракатларимиз самарасида Самарқандга келаётган хорижлик сайёҳлар сони икки баравар ошди», – деди ЎР Президенти.
У яқин йилларда Ўзбекистонга келаётган хорижий сайёҳлар сонини кўпайтириш чоралари кўрилишини таъкидлади. Биргина Самарқанддаги янги халқаро сайёҳлик мажмуаси йилига 2 миллион сайёҳни қабул қилишга қодир.
Президент Бухорода, сўнгра республиканинг барча ҳудудларида ҳам шундай марказлар очилишини маълум қилди.
«Умуман олганда, бундай ишлар туфайли яқин беш йилда мамлакатимизга келадиган сайёҳлар сонини ҳозирги 2 миллиондан 9 миллионга етказамиз», – деди Шавкат Мирзиёев.
Аввалроқ, жорий йил бошидан буён Ўзбекистонга 700 мингдан ортиқ қозоғистонлик сайёҳ ташриф буюргани хабар қилинганди .
Муаллиф: Мадибек Жанибеков
