Япониянинг GMO Internet компанияси хакерларни аниқлашга ёрдам берганлар учун 1 млн долларгача мукофот таклиф қилди
ASTANA. Kazinform — Япониянинг GMO Internet Group интернет-провайдери валюта савдоси хизматларига ноқонуний кирган хакерларни аниқлашга ёрдам берадиган маълумот учун 1 миллион долларгача мукофот беришини маълум қилди. Бу ҳақда Kyodo News хабар берди.
Компания маълумотига кўра, «GMO Cybercrime Bounty» дастури доирасида маълумотлар япон, инглиз ва хитой тилларида қабул қилинади. Дастур чоршанба куни туш пайтида бошланиб, гумонланувчилар қўлга олингунга қадар давом этади. Шунингдек, компания шахсий маълумотлари ошкор бўлгани тасдиқланган жабрланган мижозларга 3 миллион иенгача (тахминан 19 минг доллар) товон пули тўлайди.
Киберҳужумга алоқадорликда гумон қилинаётган хакер компаниядан 1 миллион доллар миқдорида тўлов талаб қилган. Талаб бажарилмаганидан сўнг, сешанба куни бир мижознинг исми-шарифи, манзили ва бошқа шахсий маълумотлари интернетга жойлаштирилган. Бироқ ҳозирча бу маълумотларнинг ҳақиқийлиги тасдиқланмаган. Хакер мижозларнинг маълумотларини ҳар куни ошкор қилиб боришини ҳам билдирган.
GMO компанияси фойдаланувчиларни интернетда эълон қилинган маълумотларни кўрмасликка чақирди. Чунки хакерлар сайтга кириш тарихи ва бошқа маълумотларни йиғиши мумкин.
Киберҳужум Onamae.com Desktop Cloud хизматига қаратилган. Компания маълумотига кўра, 20 октябрда ўтказилган текширув давомида айрим мижозларнинг серверларига бегона шахслар томонидан рухсатсиз дастурий таъминот ўрнатилгани аниқланган.
GMO бош директори Масатоси Кумагаи хакерлар криптовалютада 50 миллион доллар талаб қилаётганини, бироқ компания бу талабни бажармаслигини маълум қилди. Компания маълумотларнинг ўчирилиши ва улардан ноқонуний фойдаланилмаслигига кафолат йўқлигини таъкидлади.
Япония молия вазири ва молиявий хизматлар масалалари бўйича вазир Сацуки Катаяма молиявий ташкилотларга эҳтимолий киберҳужумлардан ҳимояланиш чораларини кучайтириш топширилганини маълум қилди. Унинг айтишича, GMO серверларидан фойдаланадиган OANDA Japan, Goldenway Japan ва Ava Trade Japan каби валюта савдоси билан шуғулланувчи бешта компаниянинг мижозлари ҳам ҳужумдан зарар кўрган.
«Рухсатсиз операциялар яна такрорланиши мумкинлигини истисно қила олмаймиз. Шунинг учун шошилинч чоралар кўрамиз», — деди Катаяма.
Эслатиб ўтамиз, аввалроқ Данияда 8,8 миллион кишининг шахсий маълумотлари хакерлар қўлига тушгани ҳақида хабар берган эдик.
