Яна 37 та хорижий компания Қозоғистонга кўчиб ўтишни режалаштирмоқда
ASTANA. Kazinform - Яна 37 та хорижий компания Қозоғистонга кўчиб ўтишни режалаштирмоқда. Бу ҳақда Ҳукумат йиғилишидан кейин ўтказилган брифингда Миллий иқтисодиёт вазири ўринбосари Бауржан Қудайбергенов маълум қилди.
“Бугунги кунда Ҳукумат йирик хорижий компанияларни релокация бўйича иш олиб бормоқда. Бизнинг рўйхатимизда 30 дан ортиқ мамлакатдан 400 га яқин компания бор. Маълумки, умумий қиймати 1,5 миллиард доллардан ортиқ бўлган 41 та компания, жумладан, inDriver ва TikTok ҳам келган. Бугунги кунда 37 та компания билан ҳамкорлик қилмоқдамиз. Ҳозирча қайси компанияларни айта олмаймиз. Иш якунида қўшимча маълумот берамиз”, - деди у ОАВ вакилларининг саволига жавоб берар экан.
Унинг қайд этишича, бу 37 та компания Қозоғистонга қачон келишини аниқ айта олмайди.
“37 та компаниянинг ҳаммаси албатта келади, деб айта олмайман. Балки камроқ, балки кўпроқ. Бироқ бу ишни йил охиригача олиб борамиз. Шуни ҳам таъкидлашни истардимки, ҳар бир компания билан индивидуал иш олиб борилмоқда. Яъни, уларда ҳақиқий талаб бор. Шартли айтганда, бир компания ер участкасини сўраса, иккинчиси преференциялар, чегирмалар ва бошқаларни сўрайди. 37 та компаниянинг умумий қиймати 1 миллиард долларга яқин. Лекин вақти-вақти билан рақам ўзгариб туради”, - деди Бауржан Қудайбергенов.
Унинг сўзларига кўра, Қозоғистонга кўчиб ўтмоқчи бўлган корхоналар орасида ишлаб чиқариш саноати, давлат технологиялари, рақамлаштириш, тоғ-кон саноати соҳаларидаги компаниялар ҳам бор.
