Яқин кунларда Қасим-Жомарт Тоқаев расмий ташриф билан Покистонга боради
Ташриф доирасида Ерлан Қошанов Покистон Миллий Ассамблеяси спикери Рожа Парвез Ашраф билан учрашиб, икки давлат ўртасидаги парламентлараро ҳамкорлик масалаларини муҳокама қилди.
Мажилис спикери ҳамкасбини Покистон Мустақиллиги ва Парламентининг 75 йиллиги билан табриклади. Қардош мамлакатга фаровонлик тилаб, Покистон Қозоғистоннинг Жанубий Осиёдаги муҳим ҳамкори эканини таъкидлади.
«Бу йил мамлакатларимиз ўртасида дипломатик муносабатлар ўрнатилганига 30 йил тўлди. Бу вақт ичида Қозоғистон ва Покистон ҳар томонлама ҳамкорликни йўлга қўйди ва маълум муваффақиятларга эришди», — деди Ерлан Қошанов.
Мажилис раиси Қозоғистонда муҳим тарихий воқеалар рўй бераётгани, Президент Қасим-Жомарт Тоқаев ташаббуси билан кенг кўламли сиёсий ислоҳотлар амалга оширилаётганига эътибор қаратди.
«20 ноябр куни Қасим-Жомарт Тоқаев Қозоғистон Президенти этиб сайланди. Келаси йили Парламент сайловларини ўтказишни режалаштирганмиз. Бу мамлакатимизда парламентаризм ривожланиши тарихида янги босқичдир. Янги қонунчиликка кўра, сиёсий партияларни рўйхатдан ўтказиш тартиблари анча соддалаштирилди. Натижада, сайловдан кейин Парламентдаги сиёсий партиялар сони кўпаяди, деб ўйлаймиз. Бу Парламентнинг жамиятдаги ўрни ва нуфузини кучайтиришга хизмат қилади», — деди Ерлан Қошанов.
Ўз навбатида, Покистон Миллий Ассамблеяси спикери Рожа Парвез Ашраф парламент дипломатиясининг муҳимлигини таъкидлади.
«Парламентлараро ҳамкорлик давом этади. Бизда катта салоҳият бор. Биз энергетика, хавфсизлик, озиқ-овқат ва ҳарбий соҳаларда ҳамкорликни ривожлантиришимиз мумкин. Айни пайтда қардош халқларимиз ўртасидаги дўстликни мустаҳкамлаш муҳим аҳамиятга эга. Мақсадимиз Марказий Осиё давлатлари билан алоқаларни мустаҳкамлаш», - деди Парвез Ашраф.
Айни пайтда икки давлат парламентлари ўртасидаги алоқалар кўп жиҳатдан ривожланиб бормоқда. «Қозоғистон-Покистон» дўстлик гуруҳи муваффақиятли фаолият юритмоқда. Бугун икки давлат депутатлари парламентлараро ҳамкорликни кенгайтиришга қаратилган мазкур гуруҳнинг биринчи йиғилишида иштирок этди. Йиғилишда дўстона гуруҳлар ва қўмиталар қонунчилик соҳасида ўзаро тажриба алмашиш бўйича келишиб олдилар.
Ташриф доирасида Ерлан Қошанов Покистон Бош вазири Шаҳбоз Шариф билан учрашди. У ерда Мажилис раиси Покистон Бош вазирига Қозоғистон Президентининг самимий саломи ва улкан эҳтиромини етказди.
«Сизнинг қисқа вақт ичида Қасим-Жомарт Тоқаев билан икки марта учрашганингиз мамлакатларимиз дўстлигини янада чуқурлаштириб, муносабатларимизни янада юксалтирмоқда. Олий даражадаги муносабатларимизнинг давоми сифатида яқин келажакда Қозоғистон Президенти Қасим-Жомарт Тоқаевнинг Исломободга расмий ташрифи режалаштирилган. Ишончим комилки, ушбу ташриф дўст мамлакатлар ўртасидаги яқин муносабатларни янги босқичга кўтариб, уларнинг янада ривожланишига катта туртки беради», – деди Мажилис спикери.
Ерлан Қошанов, Покистон давлатининг Қозоғистон мустақиллигини тан олган илк давлатлардан бири эканлигини таъкидлади.
Айни пайтда Қозоғистон ва Покистон ўртасидаги савдо-иқтисодий алоқалар йилдан-йилга ортиб бормоқда. Ўтган йили ўзаро товар айирбошлаш ҳажми 100 миллион долларга етди. Олдинги йилга нисбатан икки баравар ошди.
Покистон Бош вазири Шаҳбоз Шариф икки йил ичида Қозоғистон ва Покистон ўртасидаги савдо ҳажмини икки баробарга ошириш имконияти мавжудлигини таъкидлади.
«Ўйлайманки, Миллий Ассамблея раиси билан бугунги учрашувингиз муваффақиятли бўлди. Парламентларимиз ўртасидаги алоқани мустаҳкамлаш, иқтисодий ҳамкорликни мустаҳкамлаш учун барча имкониятлар мавжуд. Айниқса, савдо, логистика, қишлоқ хўжалиги, таълим ва илм-фан соҳаларида ҳамкорлик салоҳияти улкан. Президент Тоқаевга самимий саломларимни етказинг. Бўлажак учрашувимизни интиқлик билан кутаман ва у самарали бўлишига тўлиқ ишонаман», - деди Шаҳбоз Шариф.
Бундан ташқари, Мажилис раиси Покистон Президенти Ориф ур-Раҳмон Алви ва Покистон Сенати раиси Муҳаммад Содиқ Санжроний билан шахсан учрашди.
Мажилис раиси 230 миллиондан ортиқ аҳолига эга Покистон бозори Қозоғистонда катта қизиқиш уйғотаётганини таъкидлади.
«Мамлакатимиз Покистон денгиз портларига кириши фойдали бўларди. Ғалла, энергия ресурслари ва бошқа маҳсулотларни экспорт қилиш имкониятларини ишлаб чиқяпмиз. Минтақавий транзит ва логистика инфратузилмасини ривожлантириш биз учун жуда муҳим», — деди Ерлан Қошанов.
Учрашувларда халқаро, маданий-гуманитар ҳамкорлик масалалари ҳам муҳокама қилинди.
Томонлар дўстона муносабатлар икки давлат раҳбарларининг ўзаро манфаатли ҳамкорлиги самараси эканига эътибор қаратдилар. Икки томонлама муносабатларни мустаҳкамлашга қаратилган бу ишлар Парламент даражасида ҳам фаол давом эттирилади.
