«Ягона дарча» тамойили бўйича 2000 га яқин киши «ватандош» мақомини олди

ASTANA. Kazinform – Қозоғистон Республикаси Ташқи ишлар вазирлигининг хорижий муассасалари орқали «ватандош» мақомини олишнинг янги механизмини амалга ошириш бўйича тажриба лойиҳаси доирасида «ягона дарча» тамойили асосида 656 оиладаги 1997 нафар этник қозоқлардан аризалар келиб тушган, деб хабар беради Kazinform ҚР Меҳнат ва аҳолини ижтимоий ҳимоя қилиш вазирлиги матбуот хизматига таяниб.

Матбуот хизмати хабарига кўра, этник қозоқларнинг ушбу сўровлари Қозоғистоннинг шимолий вилоятларига юборилган.

Мурожаатларни қабул қилган маҳаллий ижро этувчи ҳокимият органлари уларни кўриб чиқиб, доимий яшаш, ишга жойлаштириш ва ҳудудий квотага киритиш бўйича тавсиялар бериши шарт.

Қозоғистон Республикасининг 2023-2027 йилларга мўлжалланган миграция сиёсати концепсиясини амалга ошириш доирасида этник қозоқларни қабул қилиш механизмини қайта кўриб чиқиш амалга оширилди.

Ўзгаришлар нафақат Қозоғистон элчихоналари орқали ҳужжатларни қабул қилишнинг янги форматига, балки ватандошларни жойлаштиришнинг қуйидаги механизмларига ҳам тегишли, хусусан:

- Қозоғистон Республикаси Ҳукумати томонидан белгиланадиган ҳудудларга кўчириш;

- агломерациялар ва қишлоқ аҳоли пунктлари, кичик ва моношаҳарлар, вилоят ва туман аҳамиятига эга шаҳарлар ҳудудларида демографик ривожланиш зарурияти билан аҳоли пунктларига жойлаштириш;

Қозоғистон ҳудудида Қозоғистон Республикаси фуқаролари бўлган оила аъзолари ёки яқин қариндошлари доимий яшашлари учун оила билан бирлашиш (уй-жой муаммоларини мустақил равишда ҳал қилиш имконияти билан);

- бўш лавозимга жойлаштириш учун иш берувчилардан таклифнома (уй-жой муаммоларини мустақил равишда ҳал қилиш имконияти билан).