Вячеслав Ким ва Михаил Ломтадзе сув тошқинидан жабр кўрганларга ёрдам бериш учун 20 миллиард тенге ажратади
Kaspi.kz асосчиларидан бири Вячеслав Ким ва Михаил Ломтадзе тошқинлардан жабр кўрган қозоғистонликларга ёрдам бериш учун 20 миллиард тенге ажратади. Маблағ Шимолий Қозоғистон ва Ақмола вилоятларига уй-жойларни тиклаш, сотиб олиш ва қуриш учун юборилади, деб хабар беради Каzinform агентлиги.
“Биз бутун мамлакат билан биргаликда бошпанасиз қолган одамларга ҳамдардмиз. Минглаб оилалар эвакуация қилинган ва улар қачон уйларига қайтишлари номаълум. Баъзи аҳоли пунктларида сув кўтарилишда давом этмоқда. Бу бахтсизлик ҳеч кимни бефарқ қолдирмайди. Давлат, тадбиркорлар ва фуқароларимиз жабрланган ҳудудлардаги аҳолининг ҳаётини тезроқ яхшилаш учун барча имкониятларни ишга солмоқда. Ўз навбатида, биз ҳам Давлат раҳбарининг жабрланганларга ёрдам беришга чақирувини қўллаб-қувватламоқчимиз ва сув тошқинлари оқибатларини бартараф этиш учун 20 миллиард тенге ажратмоқчимиз”, – деди Kaspi.kz ҳаммуассиси ва директорлар кенгаши раиси Вячеслав Ким.
Ўз навбатида, Kaspi.kz ҳаммуассиси ва бошқаруви раиси Михаил Ломтадзе “бизнинг севимли мижозларимиз, ҳамкорларимиз ва ходимларимиз” жабрланган ҳудудларда истиқомат қилишини таъкидлади.
“Тошқиннинг дастлабки кунлариданоқ улар билан доимий алоқада бўлиб, вазиятни яхши биламиз. Биз Kaspi.kz мобиль иловасида зудлик билан хайрия йиғишни ташкил қилдик ва қутқарув ускуналари, ўқ-дорилар, ёқилғи-мойлаш материаллари ва бошқа биринчи тиббий ёрдам кўрсатиш учун Biz Birgemiz Qazaqstan жамғармасига маблағ ажратдик. Афсуски, бир қатор ҳудудларда ҳамон ҳалокатли вазият сақланиб қолмоқда. Президент ташаббусини қўллаб-қувватлаб, бугунги оғир паллада мамлакатга фойдали бўлишни ўзимизнинг фуқаролик бурчимиз, деб биламиз”, – деди М.Ломтадзе.
Март ойининг охирида Каспи жамоаси Kaspi.kz иловасида онлайн хизматни ташкил қилди. Ҳар бир қозоғистонлик жабрланганларга ёрдам бериш учун Biz Birgemiz Qazaqstan жамғармасига маблағ ўтказиши мумкин. Kaspi.kz компаниясининг ўзи аллақачон йўлларни таъмирлаш, қутқарув вертолётларининг ишлашини таъминлаш, генераторлар, насослар, пуфланадиган қайиқлар ва дори-дармонларни сотиб олиш учун жамғармага 620 миллион тенге ажратган. Ўтган ҳафтада ҳам Вячеслав Ким Ақмола вилоятида 5 қаватли турар-жой қурилиши лойиҳасини молиялаштириб, зарар кўрган аҳоли пунктлари инфратузилмасини тиклаш учун маблағ ажратди.
