Венгрия банклари Қозоғистонда ўз филиалларини очади

ASTANA. Kazinform - Бугунги кунда Қозоғистон ва Венгрия умумий қиймати 70 миллион доллардан ортиқ бўлган 16 та қўшма лойиҳани амалга оширмоқда. Бу ҳақда ҚР Бош вазири ўринбосари – Ташқи ишлар вазири Мурат Нуртилеу маълум қилди, дея хабар беради Kazinform мухбири.

ТИВ раҳбарининг сўзларига кўра, ўтган йили Қозоғистон ва Венгрия ўртасидаги товар айирбошлаш ҳажми 4,4 фоизга ошиб, 200 миллион долларни ташкил этган. Келгусида бу кўрсаткични 1 миллиард долларга етказиш каби улкан мақсад бор.

“20 йил давомида Венгриядан мамлакат иқтисодиётига 370 миллион доллардан ортиқ тўғридан-тўғри инвестициялар жалб этилди, икки томонлама инвестиция портфеллари ҳам амалга оширилмоқда. Бундан ташқари, айни пайтда умумий қиймати 70 миллион доллардан ортиқ бўлган 16 та қўшма лойиҳа амалга оширилмоқда. Масалан, Венгриянинг MOL нефть-газ компанияси 200 миллион доллар сармоя киритиб, Қозоғистоннинг ғарбий қисмида йирик газ конденсати конини ўзлаштирмоқда. Globalia корхонаси қуёш энергияси станцияларини ҳам ишга туширади”, - деди Мурат Нуртилеу Венгрия ташқи иқтисодий алоқалар ва ташқи ишлар вазири Петер Сийярто билан музокаралар якунлари бўйича қўшма матбуот баёнотида.

Томонлар ҳамкорликнинг янги йўналишларини ҳам белгилаб олдилар.

“Хусусан, келгусида Қозоғистонда Венгрия банкларининг филиаллари очилиши, Будапештда мультимодал терминал қурилиши, Венгрияга нефть ва нефть маҳсулотлари экспорти кўпайишига ишончимиз комил. Шунингдек, тез орада ташкил этиладиган қўшма инвестиция жамғармаси ҳам ушбу янги ташаббусларга яхши кўмак бўлиши шубҳасиз. Умуман олганда, мамлакатларимизнинг стратегик ҳамкорлиги Шарқ ва Ғарбни боғловчи, савдо ва сармоя учун янги уфқларни очадиган олтин кўприкдир”, — деди Мурат Нуртилеу.

Аввалроқ ҚР Ташқи ишлар вазири Мурат Нуртилеу Венгрия президенти Тамаш Шуйокнинг жорий йилда Қозоғистонга ташриф буюришини маълум қилганди.