Венецияда каналдаги сув номаълум сабабларга кўра яшил рангга айланди

None
Фото: Luigii Costantini/AP
VENESIA. Kazinform – Венеция аҳолиси якшанба куни эрталаб ғайриоддий манзарага гувоҳ бўлди: машҳур Гранд каналидаги сув флуоресцент яшил рангга айланди, деб хабар беради Kazinform CNNга таяниб.

Маҳаллий ҳокимият вакиллари сувдан намуналар олиб, ноодатий ҳодиса юзасидан шошилинч текширув бошлади.

Ижтимоий тармоқларда эълон қилинган кўплаб суратларга кўра, яшил ранг биринчи бўлиб эрталаб соат 9:30 да пайдо бўлган ва шундан сўнг аста-секин кенгайган.

Машҳур Риальто кўприги атрофидаги сувнинг ранги ўзгаришига нима сабаб бўлиши мумкинлиги ҳақида кўплаб тахминлар мавжуд. Тахминларга кўра, бу бўёқ сувга қўшилган бўлиши мумкин.

Шаҳар кенгаши аъзоси Андреа Пегораро сўнгги ойларда Италия маданий мерос объектларини нишонга айлантирган эколог-фаолларни айблади.

Италия оммавий ахборот воситалари маҳаллий полиция видеокузатув камералари тасвирларини текшираётгани ҳақида хабар берди.

Кўпгина ижтимоий тармоқ фойдаланувчилари Венециядаги воқеа аргентиналик рассом Николас Гарсиа Урибурунинг 1968 йилда экология муаммоларига эътибор қаратиш учун Гранд-канал сувларини яшил рангга бўяганини эслаяпти.