Ўзбекистоннинг 105 йиллик демографик кўрсаткичлари эълон қилинди
Сўнгги йилларда аҳолининг барқарор ўсиши кузатилмоқда. Статистик маълумотларга кўра, 2020 йилда мамлакат аҳолиси 33,9 миллион кишини ташкил этган бўлса, орадан беш йил ўтиб, бу кўрсаткич 3,6 миллион кишига ошган. Шундан 18,9 миллиони (50,4 фоизи) эркаклар, 18,6 миллиони (49,6 фоизи) аёллардир. Шаҳар аҳолиси 19,1 миллион (51 фоиз), қишлоқ аҳолиси 18,4 миллион (49 фоиз) кишини ташкил этади. 2024 йилда 926,4 минг бола туғилди, бу ўтган йилга нисбатан 3,7 фоизга кам.
Миллий статистика қўмитаси эълон қилган тарихий маълумотларга назар ташласак, 1920 йилда Ўзбекистонда атиги 4,4 миллион киши яшаган. Йиллар давомида бу рақам сезиларли даражада ўсиб, 1990 йилда 20,2 миллион, 2000 йилда эса 24,5 миллион кишига етган. XXI асрда ҳам демографик ўсиш суръати юқори бўлиб, 2010 йилга келиб аҳоли сони 28 миллион, 2020 йилда эса 33,9 миллион кишини ташкил этган.
Аҳоли сонининг кўпайиши мамлакат ривожланиши учун имконият ҳам, муаммо ҳам бўлиши мумкин. Муҳими, Ўзбекистон иқтисодий ўсиш ва ижтимоий инфратузилмаларни аҳолининг ўсиш суръатига мослаштириб бормоқда.
Эслатиб ўтамиз, аввалроқ Ўзбекистонда доимий аҳоли сони 37,5 миллиондан ошгани ҳақида хабар берган эдик.
