Ўзбекистонда уюшган жиноий гуруҳнинг 100 дан ортиқ аъзоси қўлга олинди
Ўзбекистоннинг тўртта вилоятида жиноятчилик билан боғлиқ вазиятни яхшилаш бўйича “зарбдор 40 кун” кампанияси доирасида жиноий фаолиятда гумон қилинган яна 124 нафар шахс қўлга олинди, деб хабар беради Кazinform мухбири.
Ички ишлар вазирлигининг Бухоро вилояти бўйича бошқармасидан маълум қилишларича, вилоятда қидирувда бўлган 31 нафар жиноятчи қўлга олинган.
Тадбир давомида одам ўғирлаш ва талон-тарож қилишнинг 1 та, гиёҳвандлик воситалари ва психотроп воситаларининг ноқонуний айланиши билан боғлиқ 8 та, қонунга хилоф равишда қурол сақлаш бўйича 2 та ва бошқа 9 та жиноят ҳолатлари аниқланди. 5 нафар гумонланувчига нисбатан қамоққа олиш тарзидаги эҳтиёт чораси белгиланди, 15 нафарига нисбатан бошқа эҳтиёт чораси қўлланилди.
Шунингдек, 98 нафар шахс билан профилактика ишлари олиб борилиб, “ҳудуддаги жиноятчилик ҳолатига салбий таъсир кўрсатган” 38 нафар фуқаро маъмурий қамоққа олинган.
Самарқанд вилоятида махсус хизмат ва ҳуқуқ-тартибот идоралари ходимлари томонидан жиноий гуруҳнинг 47 нафар аъзоси қўлга олинди. Улардан 6 нафарига нисбатан жиноят иши қўзғатилиб, 25 нафари маъмурий жавобгарликка тортилди.
Тошкент вилоятида жиноий гуруҳнинг 34 нафар аъзоси фаолиятига чек қўйилди. Уларнинг 11 нафарига нисбатан жиноят иши қўзғатилиб, 23 нафар фуқаро маъмурий қамоққа олинган. Қўлга олинганлардан 13 дона пневматик ва ов қуроллари, ўқ-дорилар ва электрошокерлар, пичоқлар ва кастетлар мусодара қилинди.
Шунингдек, наркотик моддаларнинг ноқонуний айланиши билан боғлиқ 50 дан ортиқ ҳолат аниқланган. 11 кг гиёҳвандлик воситалари ва 8703 дона психотроп ва кучли таъсир этувчи воситалар мусодара қилинди. Жиноят содир этиб, суд ва тергов органларидан яшириниб юрган 64 нафар шахс ушланди.
Андижон вилоятида ҳам жиноят оламининг тўрт нафар вакили қўлга олинди, улардан бири муқаддам судланган. Улар оилавий зўравонлик, майда безорилик, чет эл валютасини ноқонуний олиш ёки ўтказиш билан боғлиқ жиноятларни содир этганликда гумон қилинмоқда.
Ўзбекистон бўйлаб жиноий гуруҳларни аниқлаш ва қўлга олиш бўйича кенг кўламли рейдлар ўтказилаётгани аввалроқ хабар берилган эди. Тошкентда уч нафар криминал етакчи, жумладан, жиноят оламида “Бахти Ташкентский” номи билан танилган қонун ўғриси Бахтиёр Қудратуллаев қўлга олинди. Фарғона вилоятида уюшган жиноий гуруҳнинг 22 нафар аъзоси, жумладан ММА жангчиси қўлга олинди.
Муаллиф: Мадибек Жанибеков
