Ўзбекистонда қуриладиган АЭСнинг қиймати 2 млрд доллардан ошмайди
TASHKENT. Kazinform – Ўзбекистонда қуриладиган кичик ҳажмдаги атом электр станциясининг қиймати 2 миллиард доллардан кам бўлади, деб хабар беради Kazinform ахборот агентлиги мухбири.
Лойиҳанинг нархи ҳақида Uzatom агентлиги директори Азим Аҳмадхўжаев Alter Ego каналига берган интервьюсида маълум қилди.
“Станциянинг нархи 2 миллиард доллардан кам бўлади. Бу биз режалаштирган мақсад. Ҳозирча қанча пул сарфланишини аниқ айта олмайман. Чунки бу йўналишда ҳали ҳам иш олиб борилмоқда», – дейди Азим Аҳмадхўджаев.
Унинг сўзларига кўра, агентлик ҳозирда ортиқча харажатларни қисқартиришга эътибор қаратмоқда. Шу тариқа, бугунги кунга қадар АЭС қурилиши лойиҳаси доирасида 300 миллион доллар иқтисод қилинди.
Азим Аҳмадхўжаевнинг сўзларига кўра, қурилишга Россия маблағларини жалб этиш ўрнига, АЭСни хорижий сармоя ва Хитойнинг имтиёзли кредитлари ҳисобидан молиялаштириш кўзда тутилган. Шу билан бирга, давлат бюджетидан имкон қадар камроқ фойдаланилади.
Эслатиб ўтамиз, минтақадаги биринчи кичик ҳажмдаги атом электр станцияси Ўзбекистонда Россия технологияси асосида қурилади. Ҳар бирининг қуввати 55 МВт (умумий қуввати 330 МВт) бўлган олтита реактор Жиззах вилоятидаги Тузкон кўлида қурилади. АЭСнинг биринчи реактори 2029 йил охирида ишга туширилиши режалаштирилган. 2033 йилдан бошлаб тўлиқ қувват билан ишлаш режалаштирилган.
Шунга кўра, яқинда Ўзбекистон ва Россия атом электр станциясини қуриш бўйича шартноманинг кучга кириши тўғрисидаги протоколни имзолади.
Бундан ташқари, атом электр станциясини қуриш учун халқаро консорсиум тузилади.
Муаллиф: Алихан Асқар
