Ўзбекистонда халқ табобати билан шуғулланганлик учун жазо чоралари жорий этилди

TASHKENT. Kazinform – Ўзбекистон Президенти Шавкат Мирзиёев псевдоврачлар учун жавобгарлик тўғрисидаги қонунни имзолади, деб хабар беради Kazinform агентлигининг Тошкентдаги мухбири Алихан Асқар.

Қонунга кўра, халқ табобати соҳасидаги фаолиятни амалга ошириш ҳуқуқига эга бўлмаган шахслар томонидан хизматлар кўрсатганлик учун маъмурий жавобгарлик белгиланади. Жарима миқдори – БҲМнинг 15 бараваридан 20 бараваригача. Агарда ҳуқуқбузар мансабдор шахс бўлса, жарима БҲМнинг 20 бараваридан 25 бараваригача бўлган миқдорни ташкил этади.

Бундан ташқари, халқ табобати йўналишида рухсат этилмаган усулларни қўллаган ҳолда фуқароларга тиббий ташхис қўйиш ва уларни даволаш хизматларини реклама қилиш тақиқланмоқда.

Юқоридаги қоидабузарликлар маъмурий жазо қўлланилганидан кейин бир йил ичида такрорланса, қоидабузар БҲМнинг 20 бараваридан 30 бараваригача (587-881 АҚШ доллари) бўлган миқдорида жаримага тортилади ёки 15 суткага қамоққа олинади.