Ўзбекистон ва Қозоғистон савдодаги тўсиқларни бартараф этиш бўйича ишчи гуруҳ туздилар
Яқинда Инвестициялар, саноат ва савдо вазири Лазиз Қудратов ва Қозоғистон Республикаси Савдо ва интеграция вазири Арман Шаққалиев ўртасида учрашув бўлиб ўтди. Қозоғистон Президенти Қасим-Жомарт Тоқаевнинг Ўзбекистонга ташрифи чоғида инвестиция келишувлари ва савдо шартномаларини амалга ошириш доирасида “Йўл харитаси” бўйича амалга оширилаётган ишлар, икки давлат ўртасидаги саноат кооперациясини янада ривожлантириш истиқболлари, шунингдек, жорий лойиҳаларни амалга ошириш масалалари муҳокама қилинди.
“Ўзаро савдо ҳажмини ошириш ҳақида сўз борди. Кейинги 6 йилда товар айирбошлаш ҳажми қарийб 2,5 баравар ошиб, 2016 йилдаги 1,9 миллиард доллардан 2023 йилда 4,6 миллиард долларга етди. Шу билан бирга, фойдаланилмаётган имкониятлар мавжудлигини қайд этиб, яқин йилларда товар айланмасини 10 миллиард долларга етказиш бўйича қатор чора-тадбирларни амалга оширишга келишиб олдилар. Жумладан, ўзаро савдодаги тўсиқларни бартараф этиш бўйича қўшма ишчи гуруҳи тузилади. Томонлар, шунингдек, ҳар икки давлат бозорларида кенг турдаги товарларни сотиш бўйича онлайн савдо майдончасини ўз ичига олган «UzKazTrade» қўшма ташқи савдо компанияси фаолиятини қўллаб-қувватлашга тайёр эканликларини билдирдилар”, — дейилади хабарда.
“Марказий Осиё” халқаро саноат кооперацияси маркази фаолиятини ташкил этишнинг амалий жиҳатларини инобатга олган ҳолда саноат кооперациясини ривожлантириш юзасидан конструктив фикр-мулоҳазалар билдирилди, марказни ташкил этиш ва фойдаланишга топширишни жадаллаштириш юзасидан қўшма чора-тадбирлар кўриш бўйича келишувга эришилди.
Учрашув якунида томонлар икки томонлама муносабатларни янада ривожлантириш тарафдори эканликларини тасдиқладилар ва эришилган келишувларни зудлик билан амалга ошириш учун масъул раҳбарларга топшириқлар бердилар.
