Ўзбекистон-Тожикистон чегарасида 90 килограммга яқин наркотик моддалар мусодара қилинди
Ўзбекистон ва Тожикистон чегарасида йирик ҳажмда гиёҳванд моддаларни олиб ўтиш факти аниқланди, деб хабар беради Kazinform агентлиги мухбири.
Ўзбекистон Давлат хавфсизлик хизмати маълумотларига кўра, чегара қўшинлари ходимлари билан ҳамкорликда ўтказилган тезкор қидирув тадбирлари натижасида Сурхондарё вилоятида Тожикистондан олиб келинган йирик партиядаги гиёҳвандлик воситалари олиб қўйилган.
“Ўзбекистон-Тожикистон давлат чегарасининг Сариосиё тумани Чашма аҳоли пункти ҳудудидан ўтувчи қисмидан 39 килограмм 409 грамм героин, 35 килограмм 745 грамм опий, 14 килограмм 545 грамм гашиш топилди”, – дейилади Давлат хавфсизлик хизмати хабарида.
Бошқарма маълумотларига кўра, мазкур ҳолат юзасидан Жиноят кодексининг 246-моддаси 2-қисми (Контрабанда) билан иш қўзғатилган. Ҳозирда умумий оғирлиги 89 кг 699 грамм бўлган гиёҳванд моддалар кимга тегишли эканлигини аниқлаш юзасидан тегишли чоралар кўрилмоқда.
