Ўзбекистон ҳаво кучлари C-390 Millennium самолётини қабул қилди
ASTANА. Кazinform — Ўзбекистон ҳаво кучлари Бразилиянинг Embraer компанияси томонидан ишлаб чиқарилган биринчи C-390 Millennium ҳарбий транспорт самолётини қабул қилди. Ўзбекистон иккита шундай самолётга буюртма берган эди, деб хабар беради Кazinform агентлиги Gazeta.uz га таяниб.
Самолётни расмий топшириш маросими Бразилиянинг Сан-Паулу штатидаги Гавиан-Пейшоту шаҳридаги Embraer синов базасида бўлиб ўтди. Унда Ўзбекистон ҳаво кучлари бош қўмондони Аҳмад Бурҳонов ва «Узтехтрейд» давлат корхонаси директори Олимхон Рустамов иштирок этди.
Иккита самолёт етказиб бериш бўйича шартнома 2024 йил охирида имзоланган. Ҳужжатда шунингдек, мутахассисларни ўқитиш, техник ёрдам кўрсатиш ва эҳтиёт қисмларни етказиб бериш кўзда тутилган.
C-390 Millennium ҳарбий транспорт мақсадларида турли вазифаларни бажариш учун мўлжалланган. Самолёт 26 тоннагача юк ташиши ва соатига 470 денгиз милигача тезликда учиши мумкин.
Самолёт юк ва ҳарбий хизматчиларни, қўниш ускуналари ва қўшинларни ташиш, тиббий эвакуация, қидирув-қутқарув операциялари, ёнғинни ўчириш ва гуманитар миссиялар учун ишлатилади.
Самолёт вақтинчалик ва тупроқли учиш-қўниш йўлакларидан ҳам учиши мумкин. Агар махсус ускуналар ўрнатилса, у бошқа самолётларга ҳавода ёқилғи қуйиши ва парвоз пайтида ўзи ёқилғи олиши мумкин.
Ўзбекистон Ҳарбий-ҳаво кучлари флотида шунингдек, Ил-76 ва CASA C-295 ҳарбий-транспорт самолётлари мавжуд.
Эслатиб ўтамиз, Ўзбекистон армияси гиёҳванд моддаларга қарши курашни кучайтириши ҳақида хабар берган эдик.
