Ўзбекистон халқаро фижитал спорт рейтингида 11-ўринни эгаллади

Ўзбекистон Халқаро фижитал спорт федерацияси эълон қилган жамоавий рейтинг жадвалида 11-ўринда қайд этилди, деб ёзади ЎзА.

2024 йил давомида ўтказилган фижитал спорт мусобақаларида Ўзбекистон жамоаси ўз балларини орттириб, халқаро майдонда рақобатбардошлигини намойиш этди.

Йўналишлар бўйича фижитал-футболда 12-ўрин, фижитал-баскетболда 9-ўрин, фижитал рақсда 8-ўрин қўлга киритилди.

Халқаро рейтинг низомига кўра, 1 ва 2-ўринни қўлга киритган миллий жамоалар тўғридан-тўғри "Келажак ўйинлари – 2025" халқаро мусобақаларида иштирок этиш ҳуқуқига эга бўлса, 3-26-ўринлардан жой олган миллий жамоалар халқаро квалификация ўйинларида иштирок этади.

Айтиш лозим, 2025 йил давомида юртимизда фижитал спорт турларининг бир қатор йўналишлари бўйича Ўзбекистон чемпионатлари, кубок мусобақалари, шунингдек, 4 та республика турнири ташкил этилиши белгиланган.