Ўзбекистон бу йил Қозоғистондан қанча тонна буғдой сотиб олади
TASHKENT. Кazinform — Бу йил Марказий Осиёда Қозоғистон ғалласига талаб одатдагидек юқори. Хусусан, Ўзбекистон асосий мижоз бўлиб қолади. Бундай фикр Тошкентда бўлиб ўтган Марказий Осиёнинг ғалла экспорт ва импорт қилувчи компаниялари форумида айтилди, дея хабар беради Kazinformнинг Ўзбекистондаги мухбири Алихан Асқар.
Шу кунларда Қозоғистонда ўрим-йиғим кампанияси давом этмоқда. Режага кўра, жорий йилда мамлакатда 20 миллион тонна ғалла йиғиб олинади. Шунга кўра, йиғилган маҳсулотларни экспорт қилиш бозорини дастлабки баҳолаш ишлари бошлаб юборилди.
“Биз форумга Қозоғистондан ғалла ва нефть маҳсулотларини харид қилаётган тадбиркорларни таклиф қилдик. Ушбу тадбир тўртинчи марта ўтказилмоқда. Бу йил Қозоғистондан 100 га яқин йирик ишлаб чиқарувчилар келди. Ўзбекистон бу соҳада ўрнатилган бозор ҳисобланади. Бизда буғдой импорт қилувчилар кўпчиликни ташкил қилади”, - дейди Ўзбекистон ғалла ташиш компанияси раҳбари Алишер Маҳмудов.
Бугунги кунда Ўзбекистонда 500 га яқин тегирмон мавжуд. Сўнгги йилларда бу мамлакатда ун ишлаб чиқарувчи корхоналар сони кўпайди. Шунга кўра, ғалла импорти ҳам ортиб бормоқда.
“Ҳозирда Қозоғистонда 4-синф буғдойнинг бир тоннаси - 180 доллар, 3-синф буғдой нархи 220 доллар белгиланган. Бизга асосан 4-навли буғдой керак. Сабаби, ундан тайёрланган ун Афғонистон бозорида харидоргир”, - дейди ўзбекистонлик тадбиркор Нурлан Тожибоев.
Ўзбекистон ҳар йили Қозоғистондан 4 миллион тоннага яқин буғдой сотиб олади. Мутахассисларнинг фикрича, бу йил ҳам тахминан шундай бўлади.
Қозоғистонлик ишлаб чиқарувчилар йиғилган ғаллани ўз вақтида қуритишга муваффақ бўлсалар, вазият яхшиланади.
«Kazgrain» уюшмаси буни ҳал этиш мақсадида ғалла қуритиш мосламаларини кўпайтириш ва транспорт соҳасига алоҳида чегирма беришни таклиф қилмоқда.
Қозоғистонлик ғалла етиштирувчилар учун яна бир жозибадор бозор Афғонистондир. Қозоғистон-Ўзбекистон ишбилармонлари учрашуви доирасида бу мамлакатга буғдой ва ун ташишни кўпайтириш масаласи муҳокама қилинди.
Ҳозир бир қанча афғон тадбиркорлари Ўзбекистонда тегирмонларни ижарага олиб ишламоқда. Қозоғистон буғдойининг нархини ҳам ташқаридан назорат қила бошладилар.
“Агар 20 миллион тонна ҳосил йиғадиган бўлсак, ўтган йилги қолдиқларни ҳисобга олган ҳолда 25-26 миллион тонна бўлади. Қозоғистон бозорига 6 миллион тонна керак, озиқ-овқат хавфсизлиги учун 1 миллион тонна қолса, умумий талаб қилинадиган ҳажм 7 миллион тоннани ташкил қилади. Қолганини экспорт қилиш керак”, - дейди «Kazgrain» миллий экспортчилар уюшмаси раиси Зейнулла Абдуманапов.
.
