Ўзбекистон билан трансчегаравий ҳамкорликни ривожлантириш натижа беради – Еркин Туқимов
ASTANА. Кazinform - Ўзбекистон Республикаси Президенти Шавкат Мирзиёевнинг мамлакатга давлат ташрифи доирасида Астана шаҳрида қозоқ-ўзбек экспертлари учрашуви бўлиб ўтди.
Шунингдек, ушбу учрашув Марказий Осиё давлатлари раҳбарларининг 6-маслаҳат учрашуви арафасида ташкил этилмоқда.
“Қозоғистон ва Ўзбекистон президентлари 2022 йил декабрида иттифоқчилик муносабатлари тўғрисидаги шартномани имзолаган эди. Биз экспертлар кенгашида мамлакатларимиз раҳбариятига иттифоқчилик муносабатларимиз келажагини белгилашда ёрдам беришимиз керак. Қозоғистон ва Ўзбекистон ўртасидаги муносабатлар 5, 10, 50 йилдан кейин қандай бўлади? Бундан икки давлат фуқаролари нималарга эришади? Иттифоқчилик муносабатлари нима? Мамлакатларимиз ўртасидаги муносабатлар Марказий Осиё минтақаси интеграциясига қандай таъсир кўрсатмоқда?”, - деди Қозоғистон Республикаси Президенти ҳузуридаги Қозоғистон Стратегик тадқиқотлар институти директори Еркин Туқимов.
Институт раҳбари чегара назорати тартиб-қоидаларини соддалаштириш орқали трансчегаравий ҳамкорликни ривожлантириш имкониятларини таъкидлади.
“Нега икки давлат фуқаролари соддалаштирилган ҳужжат айланмасига ўтмайди? Келажакда Тошкент – Чимкент, Тошкент – Тараз, Тошкент – Алмати, Тошкент – Астана тезюрар поездлари қатновини йўлга қўйсак. Трансчегаравий ҳамкорликни ривожлантириш ўз самарасини беради ва бошқа жиҳатларни ҳам фаоллаштиради”, - дейди у.
Бундан ташқари, ҚСТИ раҳбари икки давлат ўртасидаги ҳамкорлик масалаларини кўриб чиқиш учун Ўзбекистон Республикаси Президенти ҳузуридаги Стратегик ва минтақалараро тадқиқотлар институти билан ҳамкорликда тадқиқот олиб боришни таклиф қилди.
Эслатиб ўтамиз, 7-8 август кунлари Ўзбекистон Республикаси Президенти Шавкат Мирзиёев давлат ташрифи билан Қозоғистонда бўлади.
9 август куни Астана шаҳрида Марказий Осиё давлатлари раҳбарларининг олтинчи маслаҳат учрашуви бўлиб ўтади.
