Ўзбекистон аҳолиси 37 миллион кишидан ошди
Ўзбекистон Республикаси Статистика агентлиги маълумотларига кўра, Ўзбекистоннинг доимий аҳолиси сони 2024 йил 1 июль ҳолатига кўра 37 миллион 134,2 минг кишини ташкил қилди. Йил бошидан буён аҳоли сони 334 минг кишини ёки 2,1 фоизни ташкил этди. Аҳолининг ўртача ёши эркакларда 28,5 ёш, аёлларда 30 ёш.
Агентликнинг қўшимча қилишича, жорий йилнинг январь-июнь ойларида республикада 419,9 минг бола туғилган, жами вафот этганлар сони 81,4 минг кишини ташкил этган. Ўтган олти ойда Ўзбекистонга 116,6 минг киши келган ва 120,6 минг киши чиқиб кетган.
Республикада аҳоли зичлиги – ҳар квадрат километрга 82,7 нафар киши. Ҳудудлар кесимида аҳолининг энг юқори зичлиги Тошкент шаҳрида – 6864,4 киши, Андижон вилоятида – 796,4 ва Фарғона вилоятида – 606,3 киши. Энг паст кўрсаткичлар Навоий вилоятида – 9,8 ва Қорақалпоғистон Республикасида – 12,1 кишини ташкил этди.
Ўзбекистон Прогнозлаштириш ва макроиқтисодий тадқиқотлар институти прогнозларига кўра, туғилишнинг юқори кўрсаткичларини ҳисобга олган ҳолда, 2030 йилга бориб республика аҳолиси сони 41 миллион кишидан ошади.
