Ўтган йили Бухорога 6 млнга яқин хорижий ва маҳаллий сайёҳ ташриф буюрган
Кўҳна ва боқий Бухоронинг бой маданий-тарихий мероси, ўз бағрида бир неча асрлик мозий сир-синоатини сақлаб келаётган маҳобатли ёдгорликлари, зиёратгоҳлари бугун ҳар галгиданда гавжум, деб ёзади UzA.

Ўтган 2024 йил давомида кўҳна шаҳарга 1 миллион 745 минг 200 нафардан зиёд хорижий сайёҳ ташриф буюрган бўлиб, уларга кўрсатиладиган хизматлар орқали туризм экспорти 436,3 миллион АҚШ долларига етказилган. Шу билан бирга, республика ҳудудларидан Бухорога 4 миллиондан зиёд маҳаллий аҳоли саёҳат мақсадида ташриф буюрган.
Шаҳарнинг сайёҳлик салоҳиятини яхшилаш мақсадида ўтган йили 74 та жойлаштириш воситаси, жумладан, 17 та меҳмонхона, 15 та хостел, 42 та оилавий меҳмон уйи фаолияти йўлга қўйилди. Шунингдек, ҳудудда 43 нафар янги туроператор-турагент иш бошлаши натижасида уларнинг сони 2023 йилдаги 143 дан 186 нафарга етган.