UFC Қозоғистонда турнир ўтказмоқчи

ASTANA. Kazinform – UFC халқаро ишлар бўйича вице-президенти Дейв Шоу Абу-Дабидаги UFC Fight Night мусобақасидан сўнг бўлиб ўтган матбуот анжуманида ташкилот қайси мамлакатларда турнирлар ўтказишни режалаштираётганини айтди, деб хабар беради Kazinform «Спорт Шредингера» Telegram каналига таяниб.

“Саудия Арабистони билан тажриба ўтказганимиздан сўнг, биз ушбу минтақадаги қуйидаги мамлакатларни янги турнирларга мезбонлик қилиш учун ўрганмоқдамиз ва баҳолаймиз: Баҳрайн ва Иордания, Евроосиёда эса: Қозоғистон, Грузия ва Озарбайжон. Биз кўриб чиқаётган турли хил имкониятлар мавжуд, аммо мен бугун барча тафсилотларни ошкор қила олмайман”, – деди Дейв Шоу.

UFC “UFC Fight Night” турнирини Қозоғистонда бундан тўрт йил аввал – 2020 йил 13 июнь куни “Астана Арена”да ўтказишни хоҳлаган, бироқ коронавирус бунга халақит берган. Ушбу турнирнинг асосий жанги россиялик Петр Ян ва бразилиялик Марлон Мораес ўртасидаги жанг бўлиши режалаштирилган эди.